6 مامىردا نەگىزگى ۇبت-عا وتىنىشتەردى قابىلداۋ باستالادى. ول 14 مامىرعا دەيىن بولادى.
تەستىلەۋدىڭ ءوزى 16 مامىردا باستالىپ، 5 شىلدەگە دەيىن جالعاسادى. دەگەنمەن، توتەنشە جاعداي رەجيمى جاريالانعان 6 وڭىردە (اقمولا، اقتوبە، اتىراۋ، باتىس قازاقستان، قوستاناي، سولتۇستىك قازاقستان وبلىستارى) تىركەلۋ ۋاقىتى ۇزارتىلادى، دەپ حابارلايدى اlmaty-akshamy.kz.
ۇلتتىق تەستىلەۋ ورتالىعىنىڭ حابارلاۋىنشا، ۇبت 6-20 مامىر مەن 25 مامىر-12 شىلدە ارالىعىندا وتكىزىلەدى.
عىلىم جانە جوعارى ءبىلىم مينيسترلىگىنىڭ شەشىمى بويىنشا بيىل تالاپكەرلەر نەگىزگى ۇبت-نى ەكى رەت تاپسىرىپ، ەڭ ۇزدىك ناتيجەمەن گرانت كونكۋرسىنا قاتىسا الادى.
ۇبت-عا قاتىسۋ ءۇشىن ۇلتتىق تەستىلەۋ ورتالىعىنىڭ app.testcenter.kz سايتى نەمەسە UTO قوسىمشاسى ارقىلى تىركەلۋگە بولادى. تالاپكەرلەر تەستىلەۋ كۇنىن، ۋاقىتىن جانە پۋنكتىن وزدەرى تاڭدايدى. بۇل رەتتە ولار ەكى مۇمكىندىك ءۇشىن بەيىندىك پاندەردىڭ ءبىر عانا كومبيناسياسىن بەلگىلەيدى.
تالاپكەرلەردىڭ نەگىزگى ۇبت-عا دايىندىعىن جاقسارتۋ ماقساتىندا وسىعان دەيىن ءار ءپان بويىنشا جەكە تاقىرىپتىق تالداۋ ەنگىزىلدى. ياعني، ءار ۇبت-دان كەيىن (قاڭتار، ناۋرىز) تۇلەكتەرگە جەكە تاقىرىپتار بويىنشا بىلىمدەرىن ارتتىرۋ ۇسىنىلادى. سونىمەن قاتار، ءبىرىنشى مۇمكىندىكتى تاپسىرعاننان كەيىن ولار ەكىنشى مۇمكىندىككە دەيىن دايىندىقتارىن جاقسارتا الادى . ودان بولەك، ونلاين بايقاۋ سىناقتارى ىسكە قوسىلعان. ءبىلىم بەرۋ ورتالىقتارىمەن بىرىگىپ ۇيىمداستىرىلعان تەگىن ونلاين ساباقتار جالعاسۋدا. ال وقۋ جىلىنىڭ باسىندا ۇتو سايتىندا تەست تاپسىرمالارى قۇراستىرىلعان وقۋلىقتار ءتىزىمى مەن تەست جوسپارى؛ «قازاقستان تاريحى» جانە «دۇنيەجۇزى تاريحى» پاندەرى بويىنشا 100 تاريحي داتا ءتىزىمى؛ «ينفورماتيكا» پانىنەن تەرميندەر ءتىزىمى؛ «قازاق ادەبيەتى» جانە «ورىس ادەبيەتى» بويىنشا ادەبي شىعارمالار ءتىزىمى جاريالاندى.
تەستىلەۋ فورماتىندا وزگەرىس جوق. 2024 جىلعى تالاپكەرلەر ءۇش مىندەتتى جانە تاڭداۋ بويىنشا ەكى پاننەن تەست تاپسىرادى. «وقۋ ساۋاتتىلىعى» مەن «ماتەماتيكالىق ساۋاتتىلىق» مىندەتتى پاندەرىنەن تاپسىرمالار سانى 5 سۇراققا قىسقاردى. بۇل بەيىندىك پاندەر بويىنشا سۇراقتار سانىن 40-قا دەيىن ارتتىرۋعا مۇمكىندىك بەردى. سونىمەن قاتار بەيىندىك پاندەردە بەرىلگەن تىزىمنەن سايكەستىكتى انىقتاۋعا ارنالعان 5 تاپسىرما قوسىلدى، – دەلىنگەن حابارلامادا.
ورتالىقتىڭ مالىمەتىنە قاراعاندا، وسىلايشا، ۇبت تاپسىرمالار سانى وزگەرىسسىز قالادى. جالپى 120 سۇراق. ونىڭ ىشىندە «قازاقستان تاريحىنان» 20 تاپسىرما، «وقۋ ساۋاتتىلىعىنان» 10 تاپسىرما، «ماتەماتيكالىق ساۋاتتىلىقتان» 10 تاپسىرما جانە ەكى بەيىندىك ءپان بويىنشا 40 تاپسىرما. جوعارى بالل – 140، ول دا وزگەرىسسىز قالدى.
تەستىلەۋدىڭ جالپى ۋاقىتى – 4 ساعات (240 مينۋت). سونىمەن قاتار ەرەكشە ءبىلىم بەرۋ قاجەتتىلىكتەرى بار بالالارعا قوسىمشا 40 مينۋت ۋاقىتى ساقتالادى.
اكادەميالىق ادالدىقتى قامتاماسىز ەتۋ ماقساتىندا تەست نۇسقالارى تاڭبالانعانىن اتاپ وتكەن ءجون. ياعني، ۇبت-عا قاتىسۋشىلاردىڭ ءارقايسىسىنىڭ جەكە تەست نۇسقاسى بولادى. سونىمەن قاتار، كالكۋلياتور، حيميالىق ەلەمەنتتەردىڭ پەريودتىق جۇيەسى مەن تۇزداردىڭ ەرىگىشتىك كەستەسى كومپيۋتەر ەكرانىندا قولجەتىمدى ەتىلەدى. تالاپكەرلەردىڭ پىكىرى مەن قالاۋىن ەسكەرە وتىرىپ، ولارعا كەستەلەردىڭ قاعاز نۇسقاسى بەرىلەدى.
تەست تاپسىرۋشىلار تەستىلەۋ اياقتالعاننان كەيىن 30 مينۋت ىشىندە اپەللياسياعا ءوتىنىش بەرە الادى. سەرتيفيكات اپپەلياسيالىق كوميسسيانىڭ شەشىمىنەن كەيىن تالاپكەردىڭ جەكە كابينەتىندە قولجەتىمدى بولادى.
شەكتى بالل وزگەرگەن جوق: «قۇقىق» جانە «پەداگوگيكالىق عىلىمدار» ءبىلىم بەرۋ سالالارى ءۇشىن كەمىندە 75 بالل، «دەنساۋلىق ساقتاۋ جانە الەۋمەتتىك قامتاماسىز ەتۋ (مەديسينا)» كەمىندە 70 بالل، «اۋىل شارۋاشىلىعى جانە بيورەسۋرستار»، «ۆەتەريناريا» كەمىندە 60 بالل (ۇلتتىق جوو ءۇشىن)؛ ۇلتتىق جوعارى وقۋ ورىندارىنا ءتۇسۋ ءۇشىن كەمىندە 65 بالل، باسقا جوعارى وقۋ ورىندارىنا كەمىندە 50 بالل جيناۋ كەرەك.
تەستىلەۋگە كىرگىزۋ كەزىندە قول جانە رامالىق مەتالل ىزدەگىشتەر پايدالانىلادى. بۇل تالاپكەرلەردىڭ قاۋىپسىزدىگىن قامتاماسىز ەتىپ، ەرەجەلەردى بۇزۋ مەن تىيىم سالىنعان زاتتاردى (ۇيالى تەلەفون، شپارگالكا جانە ت.ب.) الىپ ءوتۋدىڭ الدىن الۋ ءۇشىن قاجەت.
تەستىلەۋ كەزىندە اۋديتوريانىڭ جانە بەينەباقىلاۋدىڭ اۋدانىنا بايلانىستى رۇقسات ەتىلگەن ماگنيتتىك تولقىندار شەگىندە ۇتقىر جانە راديوەلەكتروندىق بايلانىس سيگنالدارىن باساتىن قۇرىلعىلار قولدانىلادى.
2024 جىلعى ۇبت اياقتالعاننان كەيىن كۇنتىزبەلىك جىلدىڭ 31 قازانىنا دەيىن تەستىلەۋدىڭ بەينەجازبالارىنا تالداۋ جۇرگىزىلەدى. تىيىم سالىنعان زاتتاردى پايدالانۋ نەمەسە ەرەجەلەردى بۇزۋ فاكتىلەرى انىقتالعان جاعدايدا ءتۇسۋشىنىڭ ۇبت ناتيجەلەرى جويىلادى.