نەگىزگى ۇبت-عا ءوتىنىش قابىلداۋ 14 مامىرعا دەيىن جالعاسادى.
ۇبت-عا قاتىسۋ ءۇشىن http://app.testcenter.kz سايتىندا تىركەۋدەن وتۋگە بولادى، دەپ حابارلايدى Almaty-akshamy.kz
تەستىلەۋدىڭ ءوزى 16 مامىردان 5 شىلدەگە دەيىن وتەدى. بۇل رەتتە تالاپكەرلەر نەگىزگى ۇبت-نى ەكى رەت تاپسىرىپ، ۇزدىك ناتيجەمەن گرانتتاردى تاعايىنداۋ كونكۋرسىنا قاتىسا الادى.
«بۇعان دەيىن مينيستر اسحات ايماعامبەتوۆ تۇلەكتەرگە جولداعان حاتىندا تالاپكەرلەرگە ءتيىمدى شەشىم قابىلدانعانىن مالىمدەگەن بولاتىن. ەندى ولار ۇبت تاپسىرۋعا جانە گرانتقا تۇسۋگە ەكى مۇمكىندىك الدى. سونىمەن قاتار ءبىر بەيىندى پاندەردىڭ كومبيناسياسىن ەكى رەت تاڭداۋعا بولادى»، - دەپ ءتۇسىندىردى ق ر بعم ۇلتتىق تەستىلەۋ ورتالىعىنىڭ ديرەكتورى رۋسلان ەمەلبايەۆ.
ايتا كەتەيىك، الدىڭعى ەكى ۇبت-2022 (قاڭتار، ناۋرىز) قورىتىندىسى بويىنشا تەستىلەنۋشىلەردىڭ ورتاشا بالى 68،5 بالدى قۇرادى، بۇل بىلتىرعى ناتيجەلەردنەن جوعارى. قاتىسۋشىلاردىڭ 70%-دان استامى شەكتى بالدى جيناي الدى، ال ەڭ ۇزدىك كورسەتكىش - 135 بالل. تالاپكەرلەردىڭ اكادەميالىق ادالدىقتى ساقتاۋىندا دا وڭ وزگەرىس بايقالادى. تىيىم سالىنعان زاتتاردى الىپ ءوتۋ ارەكەتتەرى، سونداي-اق ولاردى تەستىلەۋ كەزىندە پايدالانۋ 2-3 ەسە ازايدى.
سونىمەن قاتار ناۋرىز ايىندا وتكەن ۇبت-دا ءار ءپان بويىنشا جەكە تاقىرىپتىق تالداۋ ەنگىزىلدى. بۇل تالاپكەرلەرگە وزدەرىنىڭ ءالسىز تۇستارىن جاقسارتىپ، نەگىزگى ۇبت-عا بۇدان دا تىڭعىلىقتى دايىندالۋعا مۇمكىندىك بەرەدى.
تۇلەكتەردىڭ ۇبت-عا جاقسى دايىندالۋىنىڭ تاعى ءبىر مۇمكىندىگى – ۇلتتىق تەستىلەۋ ورتالىعىنىڭ تەگىن ونلاين-سىناق تەستىلەۋىن ىسكە قوسۋى. ونىمەن قوسا ۇتو-مەن بىرلەسىپ ازىرلەنگەن ءبىلىم بەرۋ ورتالىقتارىنىڭ تەگىن ونلاين ساباقتارى دا جالعاسىپ جاتىر.
ايتا كەتەيىك، اكادەميالىق ادالدىقتى ساقتاۋ ءۇشىن تالاپكەرلەردىڭ تەست نۇسقاسى تاڭبالانادى. ياعني ءاربىر ۇبت-عا قاتىسۋشىسىنىڭ جەكە تەست نۇسقاسى بولادى. ەرەجەلەردى بۇزعان جانە تەست تاپسىرمالارىن اۋديتوريادان تىس جەرگە شىعارۋعا تىرىسقان جاعدايدا، ۇلتتىق تەستىلەۋ ورتالىعى ەرەجە بۇزۋشىلاردى انىقتاپ، ونىڭ تەست ناتيجەلەرىن جويادى.
پاندەردىڭ سانى وزگەرىسسىز قالادى - ءۇش مىندەتتى جانە ەكى تاڭداۋ بويىنشا. تەست تاپسىرمالارىنىڭ سانى – 120. ونىڭ ىشىندە قازاقستان تاريحىنان - 15، ماتەماتيكالىق ساۋاتتىلىقتان - 15، وقۋ ساۋاتتىلىعىنان - 20 جانە ەكى بەيىندىك پاننەن - 35. ەڭ جوعارعى ۇپاي سانى – 140.
تەستىلەۋدىڭ جالپى ۋاقىتى – 4 ساعات (240 مينۋت). ەرەكشە ءبىلىم بەرۋدى قاجەت ەتەتىن تالاپكەرلەرگە تەست تاپسىرمالارىن ورىنداۋعا قولايلى جاعداي جاساۋ ءۇشىن العاش رەت نەگىزگى 240 مينۋتقا قوسىمشا تاعى 40 مينۋت بەرىلدى. سونىمەن بىرگە ەرەكشە تالاپكەرلەرگە ارنالعان تاپسىرمالاردىڭ مازمۇنىنا دا وزگەرىستەر ەنگىزىلدى. ولار ءۇشىن تەست نۇسقالارى سۋرەتتەرسىز، دياگراممالارسىز جانە سىزبالارسىز ازىرلەندى. سونداي-اق ۇبت كەزىندە كومپيۋتەر ەكرانىندا كالكۋلياتور، مەندەلەيەۆ كەستەسى جانە مەتالداردىڭ ءبىرقاتار بەلسەندىلىگى قوسىلعان تۇزدىڭ ەرىگىشتىگى كەستەسى قولجەتىمدى بولادى.
ەسكە سالا كەتەيىك، ۇمىتكەرلەر تەستىلەۋ اياقتالعاننان كەيىن 30 مينۋت ىشىندە اپەللياسياعا بەرە الادى. سەرتيفيكات اپپەلياسيا تۋرالى شەشىم قابىلدانعاننان كەيىن تەستىلەنۋشىنىڭ جەكە كابينەتىندە قولجەتىمدى بولادى.