تۇركىستان وبلىسىندا ۇقك قىزمەتكەرلەرى ەندى نۇرسۇلتان نازاربايەۆتى كۇزەتپەيتىن بولادى.
"اشىق نقا" پورتالىندا ۇلتتىق قاۋىپسىزدىك كوميتەتىنىڭ تۇركىستان وبلىسى دەپارتامەنتى تۋرالى ەرەجەگە وزگەرىستەر ەنگىزەتىن بۇيرىق جوباسى جاريالاندى. بۇل قۇقىقتىق اكتىدەن قازاقستاننىڭ تۇڭعىش پرەزيدەنتى نۇرسۇلتان نازاربايەۆقا قاتىستى ەسكەرتپە الىنىپ تاستالماق، دەپ حابارلايدى aqshamnews.kz.
ەرەجەدە «ەلباسى» دەگەن سوزبەن تىكەلەي نۇرسۇلتان نازاربايەۆقا سىلتەمە جاساۋدىڭ ورنىنا، ەندى ۇقك قىزمەتكەرلەرى تۇركىستان وبلىسىندا «باسقا كۇزەتىلەتىن تۇلعالاردىڭ» قاۋىپسىزدىگىنە جاۋاپتى بولادى دەگەن جاڭا تۇجىرىمداما ەنگىزىلەدى.
بۇل بۇيرىق، شاماسى، كونستيتۋسيالىق «قازاقستان رەسپۋبليكاسىنىڭ تۇڭعىش پرەزيدەنتى – ەلباسى تۋرالى» زاڭنىڭ كۇشىن جويۋمەن بايلانىستى تۇركىستان وبلىسى ۇقك دەپارتامەنتىنىڭ قىزمەتىن رەتتەۋ ماقساتىندا قابىلدانىپ وتىر.
ايتا كەتەرلىگى، ءدال وسى تۇركىستان وبلىسىندا ۇقك دەپارتامەنتى تۋرالى ەرەجەدەن «ەلباسى» اتاۋىنىڭ الىنىپ تاستالۋى نازار اۋدارتادى. ويتكەنى بۇل ايماق نۇرسۇلتان نازاربايەۆتىڭ جەكە باستاماسىمەن قۇرىلعان ەدى، ال 2021 جىلى تۇركىستان قالاسىندا تۇڭعىش پرەزيدەنتكە ارنالعان ەسكەرتكىش سالتاناتتى تۇردە اشىلعان بولاتىن .