ق ر تاۋەلسىزدىگىنە - 30 جىل
پاكىستاندا «بەيبىتشىلىك پەن كەلىسىم جولىنداعى كونفەسسياارالىق جانە وركەنيەتارالىق ديالوگ» تاقىرىبىندا حالىقارالىق دوڭگەلەك ۇستەل ءوتتى، دەپ حابارلايدى almaty-akshamy.kz Inform.kz-كە سىلتەمە جاساپ. ءىس-شارانى كونفەسسياارالىق جانە وركەنيەتارالىق ديالوگتى دامىتۋ جونىندەگى ن.نازاربايەۆ ورتالىعى ۇيىمداستىردى.
اتالعان جيىن ق ر تاۋەلسىزدىگىنىڭ 30 جىلدىعى مەن الەمدىك جانە ءداستۇرلى دىندەر ليدەرلەرى سەزى حاتشىلىعىنىڭ الداعى XIX وتىرىسىن اقپارات الاڭىندا كەڭىنەن ناسيحاتتاۋ ماقساتىندا ۇيىمداستىرىلدى. يسلامابادتا وتكەن جيىنعا ق ر سىرتقى ىستەر مينيسترلىگى مەن ق ر اقپارات جانە قوعامدىق دامۋ مينيسترلىگى قولداۋ كورسەتتى. قازاقستاننىڭ پاكىستان يسلام رەسپۋبليكاسىنداعى ەلشىلىگى دە كومەك كورسەتتى. دوڭگەلەك ۇستەلدىڭ مودەراتورى الەمدىك جانە ءداستۇرلى دىندەر ليدەرلەرى سەزى حاتشىلىعىنىڭ قاتىسۋشىسى، پاكىستاننىڭ يسلامدىق زەرتتەۋلەر ينستيتۋتىنىڭ باس ديرەكتورى مۋحامماد زيا ۋل-حاك الەمدە بولىپ جاتقان ۇلتارالىق جانە ءدىنارالىق قاقتىعىستار اياسىندا كونفەسسياارالىق ديالوگتى نىعايتۋدىڭ ماڭىزىن اتاپ ءوتتى.
«ادامزات بارلىق ءدىن وكىلدەرى جۇمىلا بىرلەسىپ، كۇش-جىگەرىن بىرىكتىرگەندە عانا جەڭە الاتىن ورتاق قاۋىپ-قاتەرگە تاپ بولادى. وسى تۇستا قازاقستان ۇسىنىپ وتىرعان باستامالار تەڭدەسسىز سيپاتقا يە. قازاقستان زاماناۋي قوعام بولمىسىن تۇسىنە وتىرىپ، مەملەكەتتىڭ ۇلتتىق برەندىنە جانە رۋحاني، مادەني سيمۆولىنا اينالعان بىرەگەي الاڭ - الەمدىك جانە ءداستۇرلى دىندەر ليدەرلەرىنىڭ سەزى اياسىندا بارلىق ەلدەرمەن ودان ءارى ديالوگتى دامىتۋعا نيەتتى ەكەنى قۋانتادى»، - دەدى مۇحاممەد زيا ۋل-حاك ءوز سوزىندە.
كونفەسسياارالىق كەلىسىمدى ساقتاۋداعى قازاقستاندىق تاجىريبە تاقىرىبىن قازاقستاننىڭ پاكىستانداعى توتەنشە جانە وكىلەتتى ەلشىسى ەرجان كيستافين جالعاستىردى.
«ەل تاۋەلسىزدىگىنىڭ 30 جىلىندا قازاقستان ءدىنارالىق دامۋدىڭ وزىندىك بىرەگەي مودەلىن قالىپتاستىرىپ ۇلگىردى. بارلىق وركەنيەت، دىندەر مەن مادەنيەتتەر اراسىنداعى ءوزارا ءىس-قيمىلدىڭ ماڭىزدى بۋىنى بولا وتىرىپ، قازاقستان ءتۇرلى دىندەر مەن كونفەسسيا وكىلدەرىن الەمدىك جانە ءداستۇرلى دىندەر ليدەرلەرى سەزىنىڭ ءبىر الاڭىندا بىرىكتىرە الدى»، - دەدى ە.كيستافين.
ن.نازاربايەۆ ورتالىعىنىڭ باسقارما ءتوراعاسى بولات سارسەنبايەۆ وسى جىلدىڭ 5-6 قازان كۇندەرى نۇر-سۇلتان قالاسىندا وتەتىن سەزدىڭ XIX حاتشىلىعىنا جانە ق ر پارلامەنتى سەناتىنىڭ سپيكەرى – الەمدىك جانە ءداستۇرلى دىندەر ليدەرلەرى سەزى حاتشىلىعىنىڭ باسشىسى م.اشىمبايەۆتىڭ توراعالىعىمەن وتەتىن جۇمىس توبىنا دايىندىق جۇمىستارىن ۇيىمداستىرۋ تۋرالى، سەزدىڭ ستراتەگيالىق مىندەتتەرى تۋرالى اقپاراتپەن ءبولىستى.
كونفەسسياارالىق جانە وركەنيەتارالىق ديالوگتى دامىتۋ جونىندەگى ن.نازاربايەۆ ورتالىعى باسپا ءسوز قىزمەتىنىڭ مالىمەتىنشە، الەمدىك جانە ءداستۇرلى دىندەر ليدەرلەرى سەزىنىڭ نەگىزگى يدەيالارىن، ماقساتتارى مەن مىندەتتەرىن ناسيحاتتاۋعا ارنالعان حالىقارالىق دوڭگەلەك ۇستەلدەر سەرياسى شۆەيساريا، چەحيا، ساۋد ارابياسى، ارمەنيا، ۆەنگريا، گەرمانيا، يران، كانادا، قىرعىزستان، مالايزيا، تۇركيادا جوسپارلانعان.