نۇرسۇلتان نازاربايەۆتان كتك تەلەارناسى اكسيالارىنىڭ ءبىر بولىگىن الادى.
بۇل جەردە تەلەارنانىڭ 1% اكسياسى تۋرالى ءسوز بولىپ وتىر. نۇرسۇلتان نازاربايەۆ قورىنا كتك اكسيالارىنىڭ 90% - دان استامى تيەسىلى، دەپ حابارلايدى Almaty-akshamy.kz Bes.media-عا سىلتەمە جاساپ.
الماتىنىڭ مامانداندىرىلعان اۋدانارالىق ەكونوميكالىق سوتى بوستاندىق اۋدانى پروكۋراتۋراسىنىڭ «كوممەرسيالىق تەليەۆيزيالىق ارنا» اق اكسيالارىنىڭ 1% سىيعا تارتۋ شارتىن جارامسىز دەپ تانۋ تۋرالى تالابىن قاناعاتتاندىردى. بۇل ۇلەس بۇرىن «ماڭعىستاۋمۇنايگازعا»، ال ءقازىر – نۇرسۇلتان نازاربايەۆ قورىنا تيەسىلى بولعان.
ءىستىڭ ءمان-جايى
كتك اكسيالارىنىڭ 1% بۇرىنعى يەسى – «ماڭعىستاۋمۇنايگاز» اق – بەيىندى ەمەس اكتيۆتى اۋكسيوندا ساتۋعا تىرىستى. ءبىراق ساتىپ الۋشىلار تابىلمادى، سوندىقتان اكسيالار ارناعا سىيعا تارتىلدى، ولار كەيىنىرەك باسقالارمەن بىرگە كتك اكسيونەرلەرىنىڭ ءبىرى – نۇرسۇلتان نازاربايەۆ قورىنا بەرىلدى. ونىڭ ديرەكتورى - داريعا نازاربايەۆا، ال قۇرىلتايشىسى - اكەسى. 31 250 دانا اكسيا بىرلىگىنە 500 تەڭگە باعامەن ساتىلدى، قورىتىندى سوما 15،6 ملن تەڭگەنى قۇرادى.
ءبىر كەزدەرى «ماڭعىستاۋمۇنايگاز» اق-عا تيەسىلى اكسيالاردىڭ بەرىلۋىن الماتى اۋداندىق پروكۋراتۋراسى سوتتا داۋلادى.
سوت شەشىمى
«بوستاندىق اۋدانى پروكۋراتۋراسىنىڭ تالابى قاناعاتتاندىرىلسىن. «ماڭعىستاۋمۇنايگاز» اق مەن «كوممەرسيالىق تەليەۆيزيالىق ارنا» اق اراسىندا جاسالعان 2016 جىلعى 19 جەلتوقسانداعى اكسيالاردى سىيعا تارتۋ شارتى جارامسىز دەپ تانىلسىن. جاۋاپكەرلەردەن مەملەكەت كىرىسىنە 1727 تەڭگە مولشەرىندە مەملەكەتتىك باج ءوندىرىلىپ الىنسىن. سوتتىڭ بۇل شەشىمىنە ءبىر اي ىشىندە شاعىمدانۋعا بولادى»، - دەدى سۋديا گاۋحار قاسىمبايەۆا.
ول ءوزىنىڭ شەشىمىن مامىلە «ق ر مەملەكەتتىك مۇلكى تۋرالى» زاڭدى بۇزا وتىرىپ جاسالعانىن جانە ق ر ازاماتتىق كودەكسىنىڭ 157 جانە 158-باپتارىنىڭ تالاپتارىنا سايكەس كەلمەيتىنىن ءتۇسىندىردى.
«سوت بارلىق دالەلدەمەلەردى جيىنتىقتا باعالاي وتىرىپ، مىناداي قورىتىندىعا كەلدى: ءىستى مالىمدەلگەن تالاپ شەگىندە قاراۋ. سوت وتىرىسىندا اتالعان اكسيالاردىڭ ءۇشىنشى تۇلعاعا تيەسىلى ەكەندىگى انىقتالعاندىقتان، سوت مالىمدەلگەن تالاپ شەگىندە تالاپ ارىزدى قاراپ، بوستاندىق اۋدانى پروكۋراتۋراسى تالاپتارىنىڭ نەگىزدىلىگى تۋرالى قورىتىندىعا كەلدى»، - دەپ تولىقتىردى سۋديا.
جاۋاپكەرلەردىڭ ۇستانىمدارى
جاۋاپكەرلەر – «ماڭعىستاۋمۇنايگاز» جانە كتك وكىلدەرى بۇرىن سوتقا قاتىسقان بولاتىن. «ماڭعىستاۋمۇنايگاز» وكىلى سوت تالابىن مويىندادى، ال كتك مويىندامادى. كتك وكىلى «ماڭعىستاۋمۇنايگازعا» كومپانيانىڭ ءوزى بەلگىلەنگەن ءراسىمدى بۇزىپ، وسى اكسيالاردى سىيعا تارتۋىنا بايلانىستى مامىلەنى جارامسىز دەپ تانۋعا بايلانىستى بارلىق شىعىنداردى جۇكتەۋدى سۇرادى.
91،36% ۇلەسى بار كتك-نىڭ ءىرى اكسيونەرى نۇرسۇلتان نازاربايەۆ قورى بولىپ وتىر، ونىڭ قۇرىلتايشىسى – نۇرسۇلتان نازاربايەۆ. قور ديرەكتورى - داريعا نازاربايەۆا.