الماتىلىق تومەنگى سىنىپ وقۋشىلارىنا جول قاۋىپسىزدىگىن ساقتاۋ ەرەجەلەرى ءتۇسىندىرىلدى
ونىڭ اياسىندا جول قوزعالىسى ەرەجەلەرى بويىنشا ءتۇرلى-تۇستى بروشيۋرالار، بۋكلەتتەر مەن جادىنامالار ازىرلەندى. ولار قالاداعى جالپىعا ءبىلىم بەرەتىن مەكتەپتەردىڭ باستاۋىش سىنىپ وقۋشىلارى اراسىندا تاراتىلدى، دەپ حابارلايدى Almaty-akshamy.kz Polisia.kz-كە سىلتەمە جاساپ.
«ماقسات – بالالاردىڭ قالا كوشەلەرىندە ءوزىن-وزى ۇستاۋ ەرەجەلەرى تۋرالى بىلىمدەرىن بەكىتۋ، كوشەدە ءقاۋىپسىز ءجۇرىس-تۇرىسىنىڭ تۇراقتى داعدىلارىن قالىپتاستىرۋ، جولدا ءوز ارەكەتتەرى ءۇشىن جاۋاپكەرشىلىك سەزىمىن وياتۋ. ءتۇسىندىرۋ جۇمىستارىنا كوپ كوڭىل بولىنەدى. باستاۋىش سىنىپ وقۋشىلارى اراسىندا تاقىرىپتىق ساباقتار وتكىزىلدى. بالالار جولدا ءجۇرۋ ەرەجەلەرى تۋرالى بىلىمدەرىن كەڭەيتىپ، تاجىريبەلەرىمەن ءبولىستى، جولدى دۇرىس كەسىپ ءوتۋ جولدارىن ايتتى. سونىمەن قاتار، مەكتەپ وقۋشىلارى ءۇشىن جول قوزعالىسى ەرەجەلەرى تۋرالى يلليۋستراسيالانعان بوياعىش كىتاپتار، بۋكلەتتەر، بروشيۋرالار ازىرلەندى»، – دەدى الاتاۋ اۋداندىق پب ءاپب-نىڭ اعا مەملەكەتتىك جول ينسپەكتورى قۋانىش تابەيەۆ.
ونى جۇزەگە اسىرۋدىڭ جۇيەلى ءتاسىلى جول قوزعالىسى قاۋىپسىزدىگىن قامتاماسىز ەتۋدىڭ نەگىزگى قاعيدالارىنىڭ ءبىرى بولىپ جاريالاندى. ءبىلىم بەرۋ مەكەمەلەرى بالالاردى وقىتۋ، تاربيەلەۋ جۇيەسىنىڭ نەگىزگى بۋىندارى سانالادى جانە جول قوزعالىسى قاۋىپسىزدىگى ماسەلەلەرىن شەشۋگە جان-جاقتى كومەك كورسەتەدى.
«جىل سايىن قالادا كولىكتەر كوبەيىپ كەلەدى. ال كەيدە جولدارداعى جاعداي وڭاي ەمەس. سوندىقتان بالالاردىڭ ءومىرى مەن دەنساۋلىعىن ساقتاۋ – پوليسيانىڭ باستى مىندەتتەرىنىڭ ءبىرى. ءبىز ولاردى قورعاۋ ءۇشىن جانە كوشەلەردە، جولداردا، كولىكتە ءقاۋىپسىز ءجۇرىس-تۇرىستىڭ قاجەتتى بىلىمدەرىن، داعدىلارىن، ادەتتەرىن قولجەتىمدى جولدارمەن جەتكىزۋ ءۇشىن بارلىعىن جاساۋعا مىندەتتىمىز»، – دەدى تابەيەۆ.