ەلىمىزدىڭ مينيسترلەرى ەندى اشىقتىعىمەن باعالاناتىن بولدى.
اقپارات جانە قوعامدىق دامۋ ءمينيسترى دارحان ءقىدىرالى ۆەدومستۆو باسشىلارى ەندى حالىققا اشىقتىعى بويىنشا باعالاناتىنىن ايتتى، دەپ حابارلايدى Almaty-akshamy.kz
ءمينيستردىڭ ايتۋىنشا، ۇكىمەتتىڭ 2022 جىلعى 9 تامىزداعى وتىرىسىندا پرەمەر-مينيستر كەڭەستەر اياسىندا ءبىرقاتار تاپسىرما بەرىپ، ولار بەلگىلەنگەن مەرزىمدە ورىندالعان.
«مىسالى، جاڭا ينديكاتور ازىرلەنىپ، مەملەكەتتىك ورگاندار قىزمەتىنىڭ اشىقتىق دارەجەسىن باعالاۋ ادىستەمەسىنىڭ جوباسىنا «حالىقپەن كەزدەسۋ» ەنگىزىلدى. ەندى مينيسترلەردىڭ حالىقپەن كەزدەسۋى مەن ونىڭ ناتيجەسىن ءبىزدىڭ دەپارتامەنت باعالايدى. سونىمەن قاتار قاۋلى تالاپتارىنا ساي ۇكىمەتتىڭ قاۋلىسىمەن (2022 جىلعى 31 جەلتوقسانداعى № 1135) ورتالىق اتقارۋشى ورگاندار باسشىلارىنىڭ 2023 جىلعا ارنالعان حالىقپەن كەزدەسۋلەر كەستەسى بەكىتىلگەنىن اتاپ وتەمىن»، - دەدى دارحان ءقىدىرالى.
بۇل رەتتە مينيستر ءبىرقاتار ۇسىنىس جاسادى:
مادەنيەت ۇيلەرى مەن ورتالىق كوممۋنيكاسيالار قىزمەتىنىڭ سايتتارىندا حالىقپەن كەزدەسۋلەرمەن شەكتەلىپ قالماي، مەملەكەتتىك ورگاندارعا ازاماتتاردىڭ ءوتىنىشى اياسىندا كورسەتىلگەن پروبلەمالىق ايماقتارعا بارۋ.
ورتالىق اتقارۋشى ورگانداردىڭ سايتتارىندا عانا ەمەس، سونىمەن قاتار جەرگىلىكتى جەرلەردە، اسىرەسە، وڭىرلىك باق-تا جانە تانىمال قوعامدىق جانە مەسسەندجەر توپتارىندا مينيسترلەردىڭ وڭىرلەرگە ءىسساپارلارى تۋرالى حابارلاندىرۋلاردىڭ ءجيى جاريالانۋىن قامتاماسىز ەتۋ.
قاۋلى تالاپتارىنا ساي، مينيسترلەرمەن قاتار ۆيسە-مينيسترلەر مەن ۆەدومستۆو ءتوراعالارىنىڭ دا وڭىرلەرگە ىسساپارمەن بارۋى مىندەتتەلەدى.
دارحان ءقىدىرالىنىڭ ايتۋىنشا، بەكىتىلگەن كەستە مينيسترلەردىڭ ساپارىن رەتتەيدى. سوندىقتان مەملەكەتتىك ورگاندار ۆيسە-مينيسترلەر مەن كوميتەت ءتوراعالارىنىڭ وتىرىستارىنىڭ ۆەدومستۆولىق جوسپارىن بەكىتىپ، مينيسترلەردىڭ وتىرىسىمەن بىرگە ءار وتىرىس تۋرالى اقپارات جانە قوعامدىق دامۋ مينيسترلىگىنە ەسەپ بەرۋى قاجەت.