الماتىدا ناۋرىز مەرەكەسىنە ارنالعان مەرەكەلىك ءىس-شارالار «كوش. ناۋرىز – دۋمان» كەرۋەنىنەن باستالدى. ناۋرىزناما ءىس-شارالارى اياسىندا نەگىزگى كونسەرتتىك باعدارلامانىڭ باستاماسى ىسپەتتى بولعان تەاترلاندىرىلعان كەرۋەن قالا كوشەلەرىمەن ءجۇرىپ ءوتتى. مەرەكەلىك كوشكە باتىر، بۇركىتشى، اقىن جانە باسقا دا وبرازداعى 1000-نان استام ادام قاتىستى. سونىمەن قاتار، قالا تۇرعىندارى مەن قوناقتارى ارباداعى كيىز ءۇيدى، قىز كۇيمەسىن، قورجىنعا جىبەك ماتا مەن كىلەم ارتقان تۇيەلەردى، قۇماي تازىلار مەن مەرگەندەردى، جالپى جەتى قازىنا نىشاندارىن كوردى.
كەرۋەننەن كەيىن استانا الاڭىندا مۋزىكالىق كومپوزيسيا جانە «ناۋرىز شاشۋ» تەاترلاندىرىلعان قويىلىمىنان باستالعان «ناۋرىز – بەرەكە باستاۋى» اتتى مەرەكەلىك كونسەرت ءوتتى. ساحنادا 500-گە جۋىق ارتيست ونەر كورسەتتى، اتاپ ايتقاندا ازىمبەك بايلين، ۇشقىن جامالبەك، اسەت ەسجان، «سازگەن سازى» فولكلورلىق-ەتنوگرافيالىق وركەسترى، «الاتاۋ تەاترلارى»، «سالتانات»، «شاتتىق»، «جەتىسۋ»، «باقىت»، «كونسەپت» حورى، ەرلان رىسقالي، تامارا اسار، ايگۇل ەلشىبايەۆا، دياس مۇراتقان، قاراقات ءابىلدينا، ەركە ەسماحان، رايم، ديلناز احمادييەۆا، رومان كيم، كارينا ابدۋللينا، ايگۇل قوسانوۆا، ولەگ نيكيتين، الەكسەي لودوچنيكوۆ، اننا ۋۆاروۆا جانە ت.ب. ديماش قۇدايبەرگەننىڭ قويىلىمى كونسەرتكە كەلۋشىلەر ءۇشىن توسىنسىي بولدى.
مازمۇندى مەرەكەلىك باعدارلاما JasStars توبى، سۇلەيمەن يبراگيموۆ، جەڭىس ىسقاقوۆا، مۋزارت Life توبى، سايا ماحامبەت، «اسىل» توبى، ءمادي رىمبايەۆ، نۇرجان تاجىكەنوۆ، رايم ۋايس، ءىنجۋ، ايجان نۇرماعامبەتوۆا، IL Canto توبى، «دەرۆيشي» توبى، Alau توبى، «الاش ۇلى» توبى، ءالي وقاپوۆ، «جىگىتتەر» توبى، ءمولدىر اۋەلبەكوۆا سىندى ارتيستەردىڭ ونەر كورسەتۋىمەن ساعات 12:15-تەن 15:00-گە دەيىن جالعاسادى. ساعات 15:00-دەن 17:00-گە دەيىن «سازگەن سازى» فولكلورلىق-ەتنوگرافيالىق وركەسترى مەن «الماتى اۋەندەرى» ارتيستەرى ونەر كورسەتەدى.
بۇعان قوسا، ساعات 18:00-دەن 22:00-گە دەيىن ءبىر ساعاتتىق تەحنيكالىق ۇزىلىستەن كەيىن ايگىلى ارتيستەردىڭ قاتىسۋىمەن Zhuldyzdy Almaty فەستيۆالى باستالادى. كورەرمەندەر ءۇشىن «دوسمۇقاسان» ءانسامبلى، «ۇركەر» توبى، سەيفۋللين جولبارىس، نۇرسۇلتان بايعۇن، رايىم ۋايىس، ءمولدىر اۋەلبەكوۆا & Rabat ethno fusion، جىگەر اۋىپبايەۆ، دانا كەنتاي، «ديەتا KZ» توبى، «جىگىتتەر» توبى، Aybekman، Adil، ءابدىجاپپار ءالقوجا ساحناعا شىعادى. كەش سوڭىندا قايرات نۇرتاس «سەن مەنىڭ ادامىمسىڭ»، «بايقا»، «اق كەلىن»، «پەرزەنت سىرى»، «ءبارى دۇرىس پا؟» جانە «الماتى ءتۇنى» سىندى تانىمال اندەردى شىرقايدى.
ايتا كەتەيىك، مەرەكەلىك ءىس-شارالار اباي الاڭىندا دا ءوتىپ جاتىر. مۇندا قوناقتار مەن تۇرعىندار ءۇشىن ناۋرىزدى تويلايتىن ەلدەردىڭ مادەنيەتى مەن داستۇرلەرىن بىرىكتىرەتىن «Nauryz Fest» حالىقارالىق فەستيۆالى ۇيىمداستىرىلدى.
- فەستيۆال ءبىر شاڭىراق استىنا قازاقستان، قىرعىزستان، وزبەكستان، ءازىربايجان، تاجىكستان، تۇركيا، موڭعوليا جانە باشقۇرتستاننىڭ ناۋرىز مەيرامىن تويلاۋ داستۇرلەرىن بىرىكتىرەدى.
- قازاقستاندىقتارمەن قوسا شەتەلدىك قوناقتار فەستيۆالدە وزدەرىنىڭ ساندىك-قولدانبالى ونەرىن، سالت-داستۇرلەرىن، حالىق مۋزىكاسىن ۇسىنادى.
- اباي الاڭىندا قاتىسۋشى ەلدەردىڭ شاتىر-شەبەرحانالارى، ءتۇرلى ۇلتتىق تاعامدارى بار اسپازدىق پاۆيلوندار مەن فۋدكورت، شاڭىراعى بار ساحنا ورناتىلدى.
سونىمەن بىرگە، 22 ناۋرىز كۇنى قازاقستاندىق ەسترادا جۇلدىزدارىنىڭ قاتىسۋىمەن ساعات 19:00-دەن 22:00-گە دەيىن كەشكى كونسەرت وتەدى.