ناۋرىز مەرەكەسىن دارىپتەدى.
ناۋرىزباي اۋدانى جاستارىنىڭ كوميۋنيتي ورتالىعى قولونەرشىلەر مەن شاعىن قولدانبالى ونەر (حەند-مەيد ستيلىندە) شەبەرلەرىنىڭ «گاۋھارتاس» كورمەسىن ۇيىمداستىردى، دەپ حابارلايدى Almaty-akshamy.kz
كورمەگە ۇيىتقى بولعان ناۋرىزبايلىق قولدانبالى ونەر شەبەرلەرىمەن بىرگە، قالامىزدىڭ وزگە اۋداندارىنان دا كەلگەن شەبەر-جەتەكشىلەر جاستاردىڭ قولىنان شىققان قولونەر تۋىندىلارىن ۇسىندى. الاڭ يەلەرىنەن وزگە، تۇركسىب، المالى اۋدانىنان كەلگەن قولونەر شەبەرلەرى اكەلگەن جاستاردىڭ قولىنان شىققان ونەر تۋىندىلارىن تاماشالادىق. اۋداندا وتكەن «گاۋھارتاس» اتتى شاعىن قولونەر بۇيىمدارىنىڭ كورمەسىنە كەلۋشىلەر – نەگىزىنەن، قالامىزدىڭ بەلسەندى دەمالىس ورتالىقتارىنىڭ جەتەكشىلەرى، وكىلدەرى.
«شارانىڭ باستى ماقساتى – مەملەكەت باسشىسى اتاپ ايتقانداي، ناۋرىز مەرەكەسىن، ياكي تاتۋلىق پەن ىنتىماق مەيرامىن ءوز دەڭگەيىندە وتكىزۋ. دەمەك، ونكۇندىك اياسىندا «ناۋرىزناما» دارەجەسىندە ماعىنالى دۋمانداتۋ. ءبىز دە وسى ۇلىستىڭ ۇلى مەرەكەسىن ءار كۇنى ءارالۋان ەتىپ تويلاتىپ جاتىرمىز. بۇگىن «جاڭارۋ كۇنى» بولعاندىقتان، قازاقتىڭ باعزىدان بەرى بار دۇنيە-مۇلكىن جاڭعىرتىپ، ولاردىڭ شاعىن كولەمدەگى تۇرلەرىن كورمەگە شىعارىپ وتىرمىز. الماتى قالالىق جاستار ساياساتىن قولداۋ ورتالىعىمەن باستاماسىمەن قۇرىلعان ءبىزدىڭ ورتالىق بەلسەندى جاستارعا ارنالعان. جاستارىمىز قازاقتىڭ ۇلتتىق ءداستۇرىن دارىپتەپ، وتانداستارىمىزدىڭ سالت-ساناسىن جاڭعىرتۋعا وزىندىك ۇلەسىن وسىلاي قوسۋدا. بىزدەر جاستارىمىزدىڭ التىنداي ۋاقىتىن ءتيىمدى ءارى پايدالى وتكىزۋىنە مۇددەلىمىز. ەسىگىمىز اركەز اشىق»، دەيدى ناۋرىزباي اۋدانى جاستارىنىڭ كوميۋنيتي ورتالىعىنىڭ جەتەكشىسى الماس بايزاقوۆ.
كورمەگە كەلگەندەرىڭ كوبىنىڭ جاس مولشەرى 18 بەن 35 جاس ارالىعىندا. دەسەك تە، قىرىقتىڭ قىرقاسىنا شىققان شەبەرلەر دە ادەيى كەلىپ، جاستاردىڭ جاساعان ونەر تۋىندىلارىن كورسەتىپ، ونىڭ جاسالۋ جولىن تاپتىشتەپ ءتۇسىندىرىپ جاتتى. سولاردىڭ ىشىندە، ايرىقشا نازار اۋدارتقانى «ۇشقىندار» دەمالىس ورتالىعى جەتەكشى-شەبەرى الدىنداعى قولونەر بۇيىمدارى بولدى.
«وتكەنسىز بولاشاق جوق» دەمەكشى، كەيىنگى ۇرپاق اتا داستۇرگە قانىق بولۋى قاجەت. مىنا شارانىڭ تانىمدىق ءمانىسى سولاي. نەشە ءتۇرلى قولونەر بۇيىمدارى، كيىزدەن جاسالعان ونىمدەر اسا ۇقىپتىلىق پەن ەپتىلىكتى كەرەك ەتەدى. ەڭ باستىسى، جاس ورەندى، جاستاردى ەڭبەككە باۋلۋ، ەڭبەكقورلىققا تاربيەلەۋ.
«ءبىز بالالاردى قولونەرگە باۋلۋ ارقىلى ادال ەڭبەككە ۇيرەتەمىز. كىشكەنتاي قىزدار شەشەلەرىنە ءتۇرلى قولونەر بۇيىمدارىن جاساپ، سىيلىق ازىرلەيدى. ءارى ەڭبەك، ءارى كىشىگىرىم تابىس كوزى دەسەك تولار. ويتكەنى، سول شاعىن دۇنيە، سىيلىقتىڭ ءوزى قۇندى. بالالارعا قازاقتىڭ دومبىراسىن ۇيرەتۋدى قولعا الۋدامىز. بالالارمەن بىرگە ولاردىڭ اتا-انالارى دا قىزىعا ۇيرەنۋدە. «ناعىز قازاق – قازاق ەمەس، ناعىز قازاق – دومبىرا» دەمەكشى، وسى ءبىر ۇلتتىق مۋزىكالىق اسپاپ ۇلتتىق قۇندىلىعىمىزدىڭ باستاۋىندا تۇر عوي. دەمالىس ورتالىعىمىز ەر جانىبەك كوشەسى، 3ا-ۇيدە ورنالاسقان»، دەيدى ناۋرىزبايلىق شەبەر، «بايتەرەك» دەمالىس ورتالىعىنىڭ جەتەكشىسى مەيىرگۇل قازىبايەۆا.
مىنا شارا -- شاعىن كولەمدەگى قولونەر بۇيىمدارىنىڭ كورمەسى. كورمە ءبىر جاعىنان، كانىگى شەبەرلەر مەن جاس شەبەرلەردىڭ تاجىريبە الماسۋىنا مۇمكىندىك بەرەتىن باسقوسۋ. مىنەكەي، ۇلىستىڭ ۇلىق مەرەكەسى – ناۋرىز مەرەكەسىنىڭ ءبىر كۇنىن ناۋرىزبايلىقتار وسىلاي تويلاتتى.