بۇگىن ساياسي قۋعىن-سۇرگىن جانە اشارشىلىق قۇرباندارىن ەسكە الدى.
«قۇرمەتتى قاۋىم!
حالقىمىز 31 مامىر كۇنى ساياسي قۋعىن-سۇرگىن جانە اشارشىلىق قۇرباندارىن ەسكە الىپ، بوزداقتاردىڭ رۋحىنا قاسيەتتى قۇران اياتتارىن باعىشتايدى. بۇل – زۇلمات زامان مەن زوبالاڭ ناۋبەتتى جىلداردان ساباق الاتىن ءسات.
تالاي تاۋقىمەت پەن زۇلمات زاماندى كورگەن ۇلتىمىز سىندارلى ساتتەردە رۋحىن تۇسىرمەي، ىنتىماعىن ىدىراتپاي، تاۋەلسىز ەل بولۋعا ۇمتىلدى. اللاعا شۇكىر، كەشەگى بابالارىمىزدىڭ اڭساعان ارمانى بۇگىن شىندىققا اينالدى.
بۇگىندە ەلىمىزدە مەملەكەت باسشىسى قاسىم-جومارت توقايەۆتىڭ باستاماسىمەن زۇلىمدىقتىڭ قۇربانى بولعان ازاماتتاردى تولىق اقتاۋ، ولارعا قاتىستى تاريحي ادىلدىكتى قالپىنا كەلتىرۋ جۇمىستارى قارقىندى جۇرۋدە. قۋعىن-سۇرگىن قۇرباندارىن تولىق اقتاۋ باعىتىنداعى ساۋاپتى ىسكە ءدىن قىزمەتكەرلەرى دە وراسان ۇلەس قوسىپ كەلەدى.
بۇگىن ەلىمىزدەگى ءدىن قىزمەتكەرلەرى ازالى كۇندەردە اجال قۇشقان اتا-بابالارىمىزدىڭ رۋحىنا ارنايى قۇران اياتىن باعىشتاپ، دۇعا جاساۋدا. جاراتۋشى يەمىز ىزگى نيەتىمىز بەن يگى امالىمىزدى قابىل ەتكەي. اللا تاعالا بوزداقتارىمىزدى پاناسىنا الىپ، رۋحىن شات ەتكەي. ءامين»، دەدى قازاقستان مۇسىلماندارى ءدىني باسقارماسىنىڭ ءتوراعاسى، باس ءمۇفتي ناۋرىزباي قاجى تاعان ۇلى.