مامىر ايىنان بەرى اۋدان كوشەلەرى جوندەلىپ جاتىر.
اۋداندا جولدىڭ ساپاسىن ارتتىرۋ ماقساتىندا "تاۋسامالى"، "تاستىبۇلاق" شاعىناۋداندارىندا ۇزىندىعى 10 كم بولاتىن 6 كوشە ورتاشا جوندەۋدەن ءوتتى، دەپ حابارلايدى Almaty-akshamy.kz.
«ناۋرىزباي اۋدانىنا العاش بارعان كەزىمدە، "اقجار"، "تاستىبۇلاق" جانە "شۇعىلا" شاعىناۋداندارىنىڭ تۇرعىندارى ءاشىموۆ، تاۋتاعان جانە تاعى باسقا كوشەلەردى جوندەۋدى سۇراعان بولاتىن. قالا اكىمدىگى جۇمىستى مامىر ايىندا باستاپ كەتتى." اقجار" شاعىناۋدانىنداعى 19 كوشەدە ۇزىندىعى 4،5 كم كوشە-جول جەلىسىنىڭ قۇرىلىسى اياقتالدى. سونداي-اق، وتكەن كەزدەسۋدە «الما سيتي-5» تۇرعىندارى الاتاۋ داڭعىلىنا شىعا المايتىنىن ايتقان بولاتىن. وسى ۋچاسكەدەگى جول قۇرىلىسىن قىركۇيەككە دەيىن اياقتاۋدى جوسپارلاپ وتىرمىز»، - دەدى مەگاپوليس باسشىسى اۋدان تۇرعىندارىمەن كەزدەسۋدە.
جالپى، بيىل "اقجار"، "تاستىبۇلاق"، "شۇعىلا" شاعىناۋداندارىندا ۇزىندىعى 49 كم بولاتىن 50 كوشەنى جوندەۋ جانە سالۋ جوسپارلانعان. وسى جۇمىستار قاراشاعا دەيىن اياقتالادى.
جاۋىن-شاشىن جاۋعان كەزدە، اۋدان كوشەلەرىن سۋ باسۋ پروبلەماسى وزەكتى بولىپ قالا بەرەدى. اۋدان بويىنشا ۇنەمى سۋ باسۋعا ۇشىرايتىن 6 ۋچاسكە انىقتالدى. وسى پروبلەمانى تولىق شەشۋ ءۇشىن تج جويۋ شەڭبەرىندە قۇرىلىس جۇمىستارى باستالدى، ولاردى اعىمداعى جىلدىڭ قاراشا ايىندا اياقتاۋ جوسپارلانعان.
ويجايلاۋ وزەنىنىڭ ارناسى ۇزىندىعى 980 مەتر نىعايتىلادى، رايىمبەك داڭعىلى بويىندا «نۇرلى دالا» تك-دەن اقساي وزەنىنىڭ ارناسىنا دەيىن ۇزىندىعى 1400 م بۇرۋ ارناسى جايلاستىرىلادى، تولەبەكوۆ، تالجانوۆ، جادىرا جانە سابدەنوۆ كوشەلەرى بويىنشا ۇزىندىعى 800 م ارىق جەلىسى سالىنادى.
«سونىمەن قاتار، اعىمداعى جىلدىڭ باسىنان باستاپ ۇزىندىعى 7 كم 3 كوشەدە ارىق جەلىلەرى سالىندى جانە قايتا جاڭارتىلدى. جىل سوڭىنا دەيىن تاعى ۇزىندىعى 3 كم بولاتىن ەكى كوشەنى اياقتاۋدى جوسپارلاپ وتىرمىز»، - دەپ ناقتىلادى قالا اكىمى ەربولات دوسايەۆ.