جاڭعىرتۋ جوباسى ناۋرىزباي اۋدانىنىڭ ەلەكتر جەلىلەرىنىڭ توزۋىن 30% تومەندەتۋگە مۇمكىندىك بەرەدى. ەلەكتر جەلىلەرى مەن ترانسفورماتورلىق قوسالقى ستانسيالاردى جاڭعىرتۋ – باستى مىندەتتىڭ ءبىرى
الماتى اكىمى ەربولات دوسايەۆ ناۋرىزباي اۋدانىنىڭ تۇرعىندارىمەن كەزدەسۋدە ەلەكتر جەلىلەرى مەن ترانسفورماتورلىق قوسالقى ستانسيالاردى جاڭعىرتۋ اۋدانداعى ينجەنەرلىك ينفراقۇرىلىمدى دامىتۋدىڭ ماڭىزدى مىندەتىنىڭ ءبىرى بولىپ قالا بەرەتىنىن ايتتى، دەپ حابارلايدى almaty-akshamy.kz
قازىرگى تاڭدا اۋداننىڭ ەلەكتر جەلىلەرىنىڭ 85%-ى تولىعىمەن توزعان، سوندىقتان اپاتتىق وشۋلەر ءجيى بولىپ تۇرادى. اۋداندى تۇراقتى ەلەكترمەن قامتاماسىز ەتۋ ءۇشىن 2021 جىلدىڭ قىركۇيەگىندە مەردىگەر ۇيىم اقجار، قاراعايلى، قۇرامىس، راحات، تاۋسامالى جانە شۇعىلا شاعىن اۋداندارىندا ەلەكتر جەلىلەرىن جاڭارتۋ باستالدى. الايدا سول جىلدىڭ قاراشا ايىندا جوبانىڭ قىمباتتاۋىنا بايلانىستى جوبا توقتاتىلدى. 2023 جىلدىڭ ماۋسىمىندا تۇزەتۋلەردەن كەيىن جۇمىس قايتا جانداندى.
جوبا اياسىندا جوسپارلانعان 1231 تىرەكتىڭ 854ء-ى ورناتىلىپ، 11،2 كم ەلەكتر جەلىلەرى جاڭعىرتىلدى. قوسىمشا 26 ترانسفورماتورلىق قوسالقى ستانسيا ورناتىلادى. جۇمىستى بيىل قىركۇيەك ايىنىڭ سوڭىنا دەيىن اياقتاۋ جوسپارلانعان. سونىڭ ناتيجەسىندە جەلىلەردىڭ توزۋى 30% ازايادى.
«الاتاۋ جارىق كومپانياسى» اق جەلىسى بويىنشا 17 ترانسفورماتورلىق قوسالقى ستانسيا مەن 98 كم ەلەكتر جەلىسىنە كۇردەلى جانە اعىمداعى جوندەۋ جۇرگىزىلدى. جىل سوڭىنا دەيىن تاعى 54 ترانسفورماتورلىق قوسالقى ستانسيا مەن 150 كم ەلەكتر جەلىلەرى جوندەلەدى.
جىل باسىنان بەرى ساپالى سىرتقى جارىقتاندىرۋمەن قامتاماسىز ەتۋ ءۇشىن 20 كم-دەن استام اۋە جانە كابەل جەلىلەرى مەن 2530 شام اۋىستىرىلدى. جىل سوڭىنا دەيىن تاعى 3 كم اۋە جانە كابەل جەلىلەرىن جاڭعىرتۋ، سونداي-اق 3 مىڭ شام مەن 50 جارىقتاندىرۋ تىرەگىن اۋىستىرۋ كوزدەلگەن. سونىمەن قاتار، جىل سوڭىنا دەيىن «حالىق قاتىساتىن بيۋدجەت» باعدارلاماسى اياسىندا اۋدانداعى جارىق ورناتىلماعان قالعان 35 كوشە مەن تۇيىق كوشەلەرگە سىرتقى جارىقتاندىرۋ جەلىلەرىن جۇرگىزۋ جوسپارعا ەنگەن.