الماتى قالاسى، ناۋرىزباي اۋدانىنىڭ يننوۆاسيالىق شىعارماشىلىق ورتالىعىندا «AMANAT» پارتياسىنىڭ «قۇقىقتىق كومەك» جوباسى اياسىندا تۇرعىنداردىڭ وزەكتى ماسەلەلەرىن ءتيىمدى شەشۋگە باعىتتالعان ماڭىزدى ءىس-شارا – ءموبيلدى قوعامدىق قابىلداۋ ءوتتى.
ءىس-شارانىڭ نەگىزگى ماقساتى – تۇرعىنداردىڭ ومىرىندە تۋىنداعان تۇيتكىلدى ماسەلەلەردى تىكەلەي تىڭداپ، ولارعا جەدەل جانە بىلىكتى كەڭەس بەرۋ ارقىلى ناقتى كومەك كورسەتۋ. قابىلداۋعا الماتى قالالىق ءماسليحاتىنىڭ دەپۋتاتى بولات يبراگيم ۇلى، «AMANAT» پارتياسىنىڭ ناۋرىزباي اۋداندىق فيليالىنىڭ ءتوراعاسى بايمۇرات جامبىلوۆ، سونداي-اق مەملەكەتتىك مەكەمەلەردىڭ وكىلدەرى مەن تاجىريبەلى زاڭگەرلەر قاتىستى.
قوعامدىق قابىلداۋ كەزىندە اۋدان تۇرعىندارى ءتۇرلى سۇراقتارمەن جۇگىندى. كوتەرىلگەن ماسەلەلەردىڭ باسىم بولىگى الەۋمەتتىك-ەكونوميكالىق سيپاتتا بولدى. اتاپ ايتقاندا، ازاماتتار نەسيەلىك مىندەتتەمەلەرىن وتەۋ ءتارتىبى، مەديسينالىق مەكەمەلەرگە تىركەلۋ، بانكتىك ەسەپشوتتاردىڭ بۇعاتتالۋى، سونداي-اق تۇرعىن ۇيمەن قامتاماسىز ەتۋ جانە باسقا دا الەۋمەتتىك ماڭىزى بار ماسەلەلەر بويىنشا كومەك سۇرادى.
كەلۋشىلەردىڭ ءاربىر ءوتىنىشى جەكە قارالىپ، زاڭ اياسىندا ناقتى جاۋاپتار مەن كەڭەستەر بەرىلدى. قاجەت بولعان جاعدايدا، كەيبىر ماسەلەلەر بويىنشا جاۋاپتى ورگاندارعا رەسمي ساۋالدار جولداناتىنى ايتىلدى. زاڭگەرلەر مەن سالا ماماندارى تۇرعىندارعا قۇقىقتىق تۇرعىدان باعىت-باعدار ۇسىنىپ، تۋىنداعان جاعدايدان شىعۋ جولدارىن ءتۇسىندىردى.
دەپۋتات بولات يبراگيم ۇلىنىڭ ايتۋىنشا، مۇنداي قوعامدىق قابىلداۋلار حالىقپەن اشىق ديالوگ ورناتۋعا، ولاردىڭ مۇڭ-مۇقتاجىن جەدەل جەتكىزىپ، شەشىم قابىلداۋ ۇدەرىسىن جەڭىلدەتۋگە زور مۇمكىندىك بەرەدى:
«ءبىز ءۇشىن ەڭ ماڭىزدىسى – تۇرعىنداردىڭ سەنىمى. ولار ءوز ماسەلەسىمەن كىمگە جۇگىنەرىن ءبىلىپ، ناقتى كومەك الۋى قاجەت. پارتيانىڭ قولعا العان بۇل جوباسى وسى باعىتتا ۇلكەن ناتيجەلەرگە جەتىپ كەلەدى»، – دەدى دەپۋتات.
ۇيىمداستىرۋشىلاردىڭ پىكىرىنشە، ءموبيلدى قوعامدىق قابىلداۋلار «AMANAT» پارتياسىنىڭ حالىقپەن تىكەلەي بايلانىس ورناتۋداعى ءتيىمدى قۇرالىنا اينالدى. جوبا اياسىندا ەلىمىزدىڭ تۇكپىر-تۇكپىرىندە وسىنداي قابىلداۋلار جالعاسىن تابۋدا. بۇل باستاما پارتيانىڭ حالىقپەن اشىق ءارى ەسەپ بەرەتىن ساياسي ۇيىم ەكەنىن دالەلدەيدى.