ۇلتتىق بانك ءتوراعاسىنىڭ ورىنباسارى بەرىك شولپانقۇلوۆتىڭ ايتۋىنشا، بانكتەر ءموبيلدى تولەمدەردىڭ بانكارالىق جۇيەسىنە قوسىلادى، دەپ حابارلايدى aqshamnews.kz
ۇب وكىلىنىڭ ايتۋىنشا، بانكتەرگە ءموبيلدى تولەمدەردىڭ بانكارالىق جۇيەسىنە قوسىلۋ مىندەتى كوزدەلىپ وتىر. سوزىنشە، بۇل كليەنتتەرگە بانكارالىق QR تولەمدەر مەن ءموبيلدى اۋدارىم سەرۆيستەرىنە قولجەتىمدىلىكتى قامتاماسىز ەتۋگە مۇمكىندىك بەرەدى.
ءبىز بانكتەردىڭ ءوزارا ءتيىمدى جۇمىس ىستەۋىن، قارجى قىزمەتتەرىنىڭ قولجەتىمدى بولۋىن جانە باسەكەلەستىكتى دامىتىپ، تۇتىنۋشى قۇقىعىنىڭ قورعالۋىن قامتاماسىز ەتۋدى كوزدەيمىز. سونىمەن بىرگە ەلىمىزدىڭ قارجى سەكتورىنىڭ دەربەستىگىن نىعايتۋدى جوسپارلاپ وتىرمىز، – دەيدى ول.
بانكتەردىڭ قازىرگىدەي ءوز QR-كودى ارقىلى قىزمەتى وزىندە قالادى. سونىمەن قاتار، قاي بانك بولعانىنا قاراماستان ازاماتتار دۇكەندەردە ءبىرىڭعاي QR-كود ارقىلى اقشا تولەي الادى.
ۇلتتىق بانك ۇلتتىق سيفرلىق قارجى ينفراقۇرىلىمىنىڭ نەگىزگى كومپونەنتتەرىن ىسكە قوسقان. ولار:
ۇلتتىق تولەم جۇيەسى،
الاياقتىق ترانزاكسيالارعا قارسى ۇلتتىق ورتالىق،
قاشىقتان بيومەتريالىق سايكەستەندىرۋ جۇيەسى،
اشىق بانكينگ جانە سيفرلىق تەڭگە پلاتفورمالارى.
ءقازىر قاتىسۋشىلار سانىن كوبەيتىپ، سەرۆيستەردى ۇلعايتۋ باعىتىندا جۇمىستار جالعاسىپ جاتىر. سونىمەن قاتار، ۇلتتىق سيفرلىق قارجى ينفراقۇرىلىمىنىڭ مارتەبەسىن، ماقساتى مەن مىندەتىن بەكىتەتىن زاڭنامالىق تۇزەتۋلەر ازىرلەنگەن.