ناۋرىزباي اۋدانىندا جەكەمەنشىك مەكتەپ اشىلدى

ءبىلىم ورداسى 120 بالاعا ارنالعان. 

ناۋرىزباي اۋدانىندا ورنالاسقان وقۋ ورداسى 1 مەن 4-سىنىپ وقۋشىلارىنا  ءبىلىم بەرەدى دەپ حابارلايدى Almaty-akshamy.kz

Almaty.tv ارناسىنىڭ مالىمەتىنشە، مەكتەپتە اعىلشىن ءتىلى تەرەڭدەتىلىپ وقىتىلادى.

اقجار شاعىناۋدانىندا باستاۋىش سىنىپ وقۋشىلارىنا ارنالىپ Upstream Zerek اتتى جەكەمەنشىك مەكتەپ اشىلدى. 

«قاسىم-جومارت توقايەۆتىڭ جىل سوڭىنا دەيىن 1000 مەكتەپ سالۋ تاپسىرماسى ىسكە اسىپ جاتىر. جالپى اۋدان قۇرىلعالى 1200 ورىندىقتان 2 مەكتەپ سالىندى. قوسىمشا 1800 جانە 1500 ورىندىق مەكتەپتىڭ جاڭا قۇرىلىس جۇمىستارى جۇرگىزىلىپ جاتىر»، – دەدى ناۋرىزباي اۋدانى اكىمىنىڭ ورىنباسارى ميراس نىسانالييەۆ.

زاماناۋي جابدىقتارمەن قامتاماسىز ەتىلگەن مەكتەپتە باستاۋىش سىنىپ وقۋشىلارىنا ارنالعان 9 كابينەت، 1 سپورت زال جانە اسحاناسى بار. ازىرگە ءبىلىم قابىرعاسى وقۋ جىلىن 10 ۇستاز، 30 بالامەن باستاپ وتىر.

«مەكتەبىمىزدىڭ اۋماعى 20 سوتتىق جەردە 1000 شارشى مەتر. مەكتەبىمىز بىلتىر قىركۇيەك ايىنان باستاپ سالىندى. بۇگىن سالتاناتتى شارامىزدى وتكىزىپ، بالالارعا الىپپە كىتابىن تابىستادىق»، – دەدى مەكتەپ ديرەكتورى عاليا ساتىبالدينا.

اكىمدىك وكىلدەرىنىڭ ايتۋىنشا، بۇگىندە ناۋرىزباي اۋدانىندا 17 مەكتەپ بار. ونىڭ 9-ى مەملەكەتتىك بولسا، 8ء-ى جەكە مەنشىك.