قىرعىز ەلىنىڭ وش قالاسىندا تۇركى كەڭەسىنە مۇشە ەلدەر جاستارىنىڭ ءۇشىنشى فورۋمى ءوتتى
قازاقستان، تۇركيا، وزبەكستان، ازەربايجان مەن قىرعىزستان دەلەگاسيالارى تۇركىتىلدەس حالىقتاردىڭ رۋحاني مۇراسىن ساقتاۋدىڭ ماڭىزدىلىعىن تالقىلادى، دەپ حابارلايدى Almaty-akshamy.kz Qazaqtv.com سايتىنا سىلتەمە جاساپ.
باسقوسۋعا قاتىسۋشىلار قازاقستان پرەزيدەنتى قاسىم-جومارت توقايەۆتىڭ جاستار الەۋەتىن دامىتۋعا جاعداي جاساۋ جونىندەگى باستاماسىنا ەرەكشە قىزىعۋشىلىق تانىتتى. سونىمەن قاتار قازاقستان مەن قىرعىزستان حالقى اسسامبلەياسى جاستار قۇرىلىمدارىنىڭ كوشباسشىلارى جەكە كەزدەسۋ وتكىزدى.
قىرعىز تاراپىن ەلىمىزدىڭ جوعارى ءبىلىم بەرەتىن وقۋ ورىندارى مەن وندا قالاي وقۋعا بولاتىنى اسا قىزىقتىردى. سونداي-اق ءبىلىم بەرۋ جارمەڭكەسىن وتكىزۋ ۇسىنىلدى. قوس ەلدىڭ جاستار ۇيىمدارىنىڭ باسشىلارى ءجيى كەزدەسۋگە كەلىستى.
«قازىرگى تۇستا قوعامىمىزدىڭ باسەكەلەستىك قابىلەتى ازاماتتاردىڭ ساۋاتتىلىعىنا بايلانىستى بولىپ تۇر. بۇگىندە ورتا مەن جوعارى ءبىلىم بەرۋدىڭ ساپاسىن ارتتىرۋ كەرەك. بۇل تۋرالى پرەزيدەنتىمىز ايتتى. جوعارى ءبىلىم بەرۋ سالاسىندا باسەكەلەس ورتا قۇرۋعا سەپتىگىن تيگىزەتىن زاڭ جۇيەسىن قۇرۋ مەن ءتيىستى شەشىمدەر قابىلداۋ بويىنشا ۇكىمەت پەن پارلامەنتكە ناقتى تاپسىرمالار بەرىلدى»، - دەدى رەسپۋبليكالىق «جاراسىم» جاستار ۇيىمىنىڭ ءتوراعاسى تيمۋر جۇمىربايەۆ.