جول جوندەۋ جۇمىستارى ۇلكەن قارقىنمەن جۇرگىزىلدى
بيىل ناۋرىزباي اۋدانىندا 29 كوشەدە ورتاشا جوندەۋ جۇمىستارى اياقتالىپ، 19 شاقىرىم جول اسفالتتالدى. بۇل تۋرالى وڭىرلىك كوممۋنيكاسيالار قىزمەتىنىڭ الاڭىندا اۋدان اكىمى سانجار توعاي مالىمدەدى، دەپ حابارلايدى Almaty-akshamy.kz
"وسى ماۋسىمدا جول جۇمىستارى قارقىندى جۇرگىزىلدى. جىل باسىنان بەرى 28 000 ش.م شۇڭقىرلار جوندەۋمەن قامتىلىپ، 180 ليۋك پەن تور كوتەرىلدى. قىركۇيەكتە ۇزىندىعى 2 كم الاتاۋ كوشەسىن ەكى باعىتقا ءتورت جولاقتى قوزعالىس ارقىلى تەسۋ جۇزەگە اسىرىلدى. قونايەۆ كوشەسىن كەڭەيتۋ اياقتالدى. اباي داڭعىلىن ۇزارتۋ جالعاسۋدا"، - دەپ اتاپ ءوتتى سانجار توعاي.
اكىمنىڭ مالىمەتىنشە، ناۋرىزباي اۋدانىندا 348 كوشە بار. اسفالتتالعانداردىڭ ۇلەسى 85% قۇرايدى. ينجەنەرلىك كوممۋنيكاسيالار (سۋ قۇبىرى، كارىز) قۇرىلىسى اياقتالعاننان كەيىن بارلىق كوشە-جول جەلىلەرىن اسفالتتاۋ جوسپارلانۋدا.
بۇدان باسقا، 100 كوشە (جالپى ۇزىندىعى 114 كم) تروتۋارمەن قامتاماسىز ەتىلدى. 2021 جىلى ۇزىندىعى 9 كم 13 كوشەگە تروتۋار سالىندى.
«بيۋدجەتكە قاتىسۋ» جوباسى بويىنشا 5 كوشەدە ارىق جەلىلەرى سالىندى، 34 كوشەدە ارىق جەلىسىنىڭ قۇرىلىسى باستالدى.
ءسوزىنىڭ سوڭىندا سانجار توعاي الماتى قالاسىنىڭ اكىمى باقىتجان ساعىنتايەۆتىڭ تاپسىرماسى بويىنشا اۋداننىڭ 312 كوشەسى تولىعىمەن جارىقتاندىرىلعانىن حابارلادى. سونىڭ ىشىندە، بيىل «بيۋدجەتكە قاتىسۋ» جوباسى بويىنشا 6 باۋ-باقشا كوشەسى مەن 47 جاياۋ جۇرگىنشى جولدارى جارىقتاندىرىلدى.