الماتىنىڭ ناۋرىزباي اۋدانىنا جاڭادان قوسىلعان «قۇرامىس» شاعىناۋدانىنىڭ حالقى پارازيتكە تولى سۋ ءىشىپ وتىرمىز دەپ شاعىمداندى. ەلدى مەكەندە اۋىز سۋ ماسەلەسى راسىمەن دە پروبلەماعا اينالعان.
«ەۆرازيا» تەلەارناسىنىڭ حابارلاۋىنشا، اۋدان اكىمدىگى قۇبىر تارتۋ جۇمىسىن باستاپ، اياقتاماي كەتكەن ەكەن.
«ءبىزدىڭ كوشە وسى اۋدانداعى ەڭ جاقسى كوشە سانالادى. ءوزىمىز اقشا جيناپ، اسفالت توسەتىپ، سۋ تارتقىزىپ العانبىز. بۇكىل ينفراقۇرىلىمدى ءوزىمىز تارتتىق. قالاعا قوسىلعاننان كەيىن وركەنيەت كەلدى: كارىز قۇبىرىن قوستى، قالادان سۋ كەلدى. ءبىز العاشىندا قاتتى قۋاندىق. پروبلەماعا 1،5 جىل بويى شىداممەن قارادىق. الايدا، بيلىك بۇل ماسەلەنى شەشپەيتىن سەكىلدى»، – دەيدى جەرگىلىكتى تۇرعىن ەكاتەرينا حيشانلو.
ونىڭ ايتۋىنشا، ءقازىر شاعىناۋداندا تەك اعىندى سۋ بار. ءبىراق ونى فيلترمەن تازالاعان كۇننىڭ وزىندە ىشۋگە جارامسىز كورىنەدى. سوندىقتان حالىق دۇكەننەن سۋ ساتىپ الىپ ءىشىپ وتىر. مۇندا كارىز جۇيەسى دە كۇردەلى پروبلەماعا اينالىپ كەلەدى. ول تارتىلعانمەن، ءالى قوسىلماعان. دەسە دە، قىردا تۇراتىن تۇرعىندار وعان ءوز ەركىمەن قوسىلىپ الىپ، ءناجىستىڭ ءبارىن تومەنگە قاراي اعىزىپ جاتىر. لاس سۋ كارىز شاحتاسىنا جينالىپ قالعان. حالىقتىڭ مۇڭىن تىڭداعان جەرگىلىكتى بيلىك «اقشا جيناپ، قالعان جۇمىستى وزدەرىڭ ءبىتىرىپ الىڭدار» دەگەن كورىنەدى. تۇرعىندار: «ءقازىر قۇبىرلاردى ءوز كۇشىمىزبەن تارتىپ جاتىرمىز»، – دەيدى.
ال اكىمدىكتەگىلەر بولسا اۋىز سۋ ماسەلەسىن شەشۋ ءۇشىن قارعالى وزەنىندە فيلترلەۋ ستانسياسىن سالىپ جاتقانىن ايتتى. سۋ تارتۋ جۇمىستارى تەگىن جۇرگىزىلگەنىمەن، حالىق كارىز قۇبىرىنا ءوز قاراجاتىمەن قوسىلۋعا ءتيىس ەكەن.