ناۋرىز مەيرامىنا ارنالعان مەرەكەلىك كونسەرتتەردى 300 مىڭعا جۋىق ادام كوردى، دەپ حابارلايدى Almaty-akshamy.kz
الماتى تۇرعىندارى مەن قوناقتارىنا ديماش قۇدايبەرگەن، «الاش ۇلى»، Ulytau توبى، «دوس-مۇقاسان» ءانسامبلى، ەركە ەسماحان، ءمولدىر اۋەلبەكوۆا، قايرات نۇرتاس، قاراكات ءابىلدينا، ديلناز احمادييەۆا، ەرلان رىسقالي، تامارا اسار، ايگۇل ەلشىبايەۆا، «جىگىتتەر» توبى، AYAFUNK، ALPHA، Akha، Yenlik جانە باسقا دا كوپتەگەن تانىمال ورىنداۋشى ونەر كورسەتتى.
سونىمەن قاتار، «الاتاۋ» ءداستۇرلى ونەر تەاترىنىڭ، مەملەكەتتىك قۋىرشاق تەاترىنىڭ، قازاق مەملەكەتتىك سيركىنىڭ، سونداي-اق «الماتى اۋەندەرى» جانە «سازگەن سازى»فولكلورلىق-ەتنوگرافيالىق وركەسترىنىڭ، «سالتانات”، «شاتتىق»، «جەتىسۋ»، «باقىت» بي انسامبلدەرىنىڭ ارتيستەرى جانە ت.ب. ونەرىن پاش ەتتى. جالپى، اشىق اسپان استىنداعى ساحنادا مىڭنان استام ارتيست ونەر كورسەتتى.
جاڭبىرلى اۋا-رايىنا قاراماستان، كورەرمەندەردىڭ كوڭىل-كۇيى كوتەرىڭكى بولدى. مەگاپوليس تۇرعىندارى مەن قوناقتارى تانىمال ۇجىمدار مەن ورىنداۋشىلاردىڭ ونەرىن ىستىق ىقىلاسپەن قارسى الدى. وpen air فورماتىندا وتكەن ناۋرىز مەيرامىنداعى كونسەرتتەردى 300 مىڭعا جۋىق ادام كوردى.
ايتپاقشى، ناۋرىزناما كەزەڭىندە الماتىلىقتار مەن مەگاپوليس قوناقتارىنا 500-دەن استام ءتۇرلى ءىس-شارالار ۇيىمداستىرىلدى: قولونەرشىلەر مەن قولدانبالى ونەر كورمەلەرى، كىتاپ جارمەڭكەسى، قويىلىمدار مەن كونسەرتتەر، قايىرىمدىلىق ءىس-شارالار، جاستار فەستيۆالدەرى، زاماناۋي ديزاينداعى ۇلتتىق كيىم، زياتكەرلىك ويىندار مەن سپورتتىق جارىستار ۇلتتىق سپورت تۇرلەرى. سونداي-اق، قالانىڭ ءار اۋدانىندا تاقىرىپتىق ءىس-شارالار مەن كونسەرتتەر وتكىزىلدى.
ايتا كەتەيىك، استانا الاڭىندا باستى مەرەكەلىك ءىس-شارا وتكىزىلىپ، مەملەكەت باسشىسى قاسىم-جومارت توقايەۆ حالىقتى ناۋرىز مايرامىمەن قۇتتىقتادى.