الماتىدا اۋا ساپاسى ناشارلايدى

سينوپتيكتەر ەلىمىزدىڭ بەس قالاسىندا اۋا ساپاسى ناشار بولاتىنىن ەسكەرتتى.

24 ناۋرىزدا، جەكسەنبىدە قازاقستاننىڭ بەس قالاسىندا اۋا ساپاسى ناشارلاپ، اتموسفەرادا زياندى قوسپالار جيىنتىعى كوپ بولۋى مۇمكىن، دەپ حابارلايدى Almaty-akshamy.kz

بولجامعا سايكەس، استانا، الماتى، اتىراۋ، اقتوبە جانە قاراعاندىدا قولايسىز مەتەورولوگيالىق جاعدايلار تىركەلۋى مۇمكىن.

قولايسىز مەتەورولوگيالىق جاعدايلار (قمج) – اتموسفەرالىق اۋانىڭ بەتكى قاباتىندا لاستاۋشى زاتتاردىڭ جينالۋىنا ىقپال ەتەتىن مەتەورولوگيالىق فاكتورلاردىڭ قىسقا مەرزىمدى ەرەكشە جيىنتىعى. قولايسىز مەتەورولوگيالىق جاعداي كەزىندە ەلدىمەكەندەردەگى اتموسفەرالىق اۋانىڭ ساپاسى ناشارلاۋى مۇمكىن.

مۇنداي اۋا رايى كەزىندە:

كوشەدە، اسىرەسە، تاسجولداردىڭ بويىندا ءجۇرۋدى ازايتۋ كەرەك؛

بالالار مەن جۇكتى ايەلدەر ۇزاق ۋاقىت سەرۋەندەمەگەنى ءجون؛

سوزىلمالى وكپە، جۇرەك-قان تامىرلارى، اللەرگيامەن اۋىراتىن ادامدار دارى-دارمەگىن وزىمەن بىرگە الىپ ءجۇرۋى ءتيىس؛

تازا اۋاداعى فيزيكالىق بەلسەندىلىكتى شەكتەڭىز؛

دەنە شىنىقتىرۋ جانە سپورتتىق ءىس-شارالاردى جابىق سپورت كەشەندەرىندە وتكىزۋ كەرەك.