الماتىدا ءبىر كۇندە بىرنەشە اۋقىمدى كونسەرت ءوتتى
بيىل الماتىدا ناۋرىز مەرەكەسى ەرەكشە ناقىشتا اتالىپ ءوتىپ جاتىر. ءاز-ناۋرىز مەيرامىن تويلاۋ كەشەندى تۇردە جالعاسۋدا. قالا تۇرعىندارىنا مەرەكەلىك كوڭىل-كۇي سىيلاۋ ماقساتىندا ەسترادا جۇلدىزدارىنىڭ قاتىسۋىمەن كونسەرتتەر ۇيىمداستىرىلدى.
العاشقى كونسەرتىمىز «استانا الاڭىندا» ءوتتى. مەرەكەلىك ءىس-شارادا قۇرمانعازى اتىنداعى قازاق مەملەكەتتىك اكادەميالىق حالىق اسپاپتار وركەستىرىنىڭ اۆتورلىق كونسەرتتىك باعدارلاماسى جۇرگىزىلدى. سونىمەن قاتار، «سالتانات»، «ۇلى دالا» انسامبلدەرى، ايجان نۇرماعامبەتوۆا، قۇدايبەرگەن بەكىش، باقتيار تايلاقبايەۆ جانە باسقا دا ارتىستەر ونەر كورسەتتى.
نوسەرلەپ جاۋعان جاڭبىرعا قاراماستان مەرەكەگە جينالعان قالىڭ جۇرتشىلىقتىڭ كوڭىل-كۇيلەرى كوتەرىڭكى بولدى.
– كونسەرت وتە قىزىقتى وتۋدە. ءوزىم تانىمال جۇلدىزداردى كورىپ قۋانىپ وتىرمىن. اسىرەسە، قازاقي ءارى حالىق اندەرىن ءسۇيىپ تىڭدايمىن. كوڭىل-كۇي كوتەرىڭكى. سەبەبى، بۇگىن ەرەكشە مەيرام. قازاقتىڭ جاڭا جىلى بولىپ جاتىر. بارلىق قازاقستاندىقتارعا مەرەكە قۇتتى بولسىن. ناۋرىز وڭ بولسىن، بەرەكەلى جىل بولعاي، – دەدى قالا تۇرعىنى اليا مۇرات قىزى.
حالىقتىڭ ىقىلاسى ەرەكشە بولدى. ال، جىبەك جولى داڭعىلى مەن پانفيلوۆ كوشەسىنىڭ قيىلىسىندا وتكەن كونسەرت تىپتەن ەرەكشە بولدى. ءدال وسى جەردە ەتنو-فولكلورلىق ۇجىمدار ونەر كورسەتتى. ءتۇرلى اسپاپتار ارقىلى ونەر كورسەتكەن ونەرپازدارعا حالىقتىڭ ىقىلاسى زور بولدى. ۇلتتىق اسپاپتاردا ونەر كورسەتكەندەر تىڭدارماننىڭ قۇلاق قۇرىشىن ابدەن قاندىرا الدى.
– بۇگىنگى كۇن وتە ەرەكشە، ءارى قىزىقتى وتۋدە. ناۋرىز ءبىزدىڭ قازاقتىڭ جاڭا جىلى، بارلىق جاقسىلىق پەن مولشىلىقتى ناسيحاتتايتىن اي. بيىلعى جىلى ناۋرىز مەرەكەسى جىلداعىدان ەرەكشە وتكەنى تىپتەن كەرەمەت. كادىمگىدەي، مەرەكەلىك كوڭىل-كۇي پايدا بولىپ. اينالامىزداعى ادامداردىڭ ءبارى كوڭىلدى بولىپ جۇرگەنىن كورگەن قانداي جاقسى. وزىمە مۋزىكالىق اسپاپتار قاتتى ۇنايدى. سونىڭ ىشىندە، دومبىرادا ويناي الامىن. ال، بۇگىن مىنا ەتنو-فولكلورلىق ۇجىمداردىڭ دومبىرادا ويناعانىن كورىپ، قاتتى تاڭ قالدىم. دەڭگەيلەرى، ءبىرشاما جوعارى ەكەنى كورىنىپ تۇر، – دەدى قالا تۇرعىنى ارمان الپىسباي.
كورەرمەندەر سۇيىكتى اندەرىن قوسىلا شىرقادى.
سونىمەن قاتار، تەمىربەك جۇرگەنوۆ اتىنداعى ونەر اكادەمياسىنىڭ الدىندا دا، كونسەرتتىك باعدارلاما ۇيىمداستىرىلدى. وندا دا حالىقتىڭ قاراسى كوپ بولدى. تانىمال ەسترادا جۇلدىزدارى ءان شىرقاسا، كورەرمەندەر سۇيىكتى اندەرىن قوسىلا شىرقادى.
ءانى مەن جىرى جاراسقان جەردە حالىقتىڭ ريزاشىلىعىن سوزبەن جەتكىزۋ قيىن. كۇننىڭ سۋىقتىعىنا قاراماي، كونسەرتكە جينالعان ادامدار ءبىر-بىرىن ناۋرىز مەركەسىمەن قۇتتىقتاپ جاتتى.
