الماتىداعى كارديولوگيا جانە ىشكى اۋرۋلار عىلىمي-زەرتتەۋ ينستيتۋتىندا ەمدەۋ جانە مەديسينالىق وڭالتۋمەن مامانداندىرىلعان كارديولوگيالىق جانە تەراپيەۆتىك مەديسينالىق كومەك كورسەتىلەدى، دەپ حابارلايدى Almaty-akshamy.kz قازاقپارات-قا سىلتەمە جاساپ.
كارديولوگيا جانە ىشكى اۋرۋلار عىلىمي-زەرتتەۋ ينستيتۋتىنىڭ باسقارما ءتورايىمى، مەديسينا عىلىمدارىنىڭ دوكتورى، پروفەسسور روزا قۋانىشبەكوۆانىڭ ايتۋىنشا، ناۋقاستار وڭالتۋ كومەگىن تۇرعىلىقتى جەرىنە قاراماستان الا الادى. بۇل - نۇر-سۇلتان، الماتى قالالارىنان بولەك، اقتوبە، اتىراۋ، باتىس قازاقستان، جامبىل، قاراعاندى، قوستاناي، قىزىلوردا، ماڭعىستاۋ مەن تۇركىستان وبلىستارىنان كەلەتىن پاسيەنتتەر. كلينيكا باسشىسى ايتىپ وتكەندەي، جۇرگىزىلەتىن كارديولوگيالىق وڭالتۋ اۋىر كارديولوگيالىق سىرقاتقا (ميوكارد ينفاركتى، ءجىتى كورونارلىق سيندروم، ەندوۆاسكۋليارلىق ارالاسۋلار، كورونارلىق شۋنتتاۋ جانە جۇرەك، ونىڭ قاقپاقشالارى مەن تامىرلارىنا جاسالعان باسقا حيرۋرگيالىق ارالاسۋلار) شالدىققان پاسيەنتكە كومەك كورسەتۋگە باعىتتالعان ءىس-شارالار كەشەنىنەن تۇرادى.
كارديولوگيالىق وڭالتۋعا ەمدىك دەنە شىنىقتىرۋ، مولشەرلەنگەن جاياۋ ءجۇرىس، ۆەلوترەناجەردا جاتتىعۋ، تەمەكى شەگۋدەن باس تارتۋ، ليپيدتەردىڭ سالماعى مەن دەڭگەيىن قالپىنا كەلتىرۋ، سونداي-اق كارديوۆاسكۋليارلىق پاتولوگيانىڭ ءقاۋىپ فاكتورلارىن ازايتۋعا مۇمكىندىك بەرەتىن پسيحولوگيالىق قولداۋ كىرەدى.
«كارديولوگيالىق وڭالتۋدا دەنساۋلىقتى ساقتاۋ، قالپىنا كەلتىرۋ، دەنە قيمىلىنىڭ بەلسەندىلىگى، ەڭبەككە جارامدىلىق، الەۋمەتتىك بەلسەندىلىك؛ فيزيكالىق بەلسەندىلىگىنىڭ كەڭەيۋىن ەسكەرە وتىرىپ، جۇرەك-قانتامىر پاتولوگياسىنىڭ اسقىنۋى مەن ءورشۋىنىڭ الدىن الۋعا ارنالعان دارى-دارمەكتىك تەراپيانى وڭتايلاندىرۋ، اۋرۋدىڭ سالدارىن جويۋ ءۇشىن ناۋقاستىڭ پسيحولوگيالىق جاعدايىن رەتتەۋ سەكىلدى اسپەكتىلەر وتە ماڭىزدى»، - دەيدى روزا توحتانالى قىزى.
كارديولوگيالىق وڭالتۋداعى ماڭىزدى فاكتور - ينستيتۋتتا قۇرىلعان پاسيەنت مەكتەبىنە ناۋقاستىڭ قاتىسۋى. دەنساۋلىق مەكتەپتەرىندە تەك قانا ءبىلىم المايدى، سونىمەن قاتار ادام ومىرىنە ءقاۋىپتى اۋرۋلاردىڭ دامۋىنا اسەر ەتەتىن ءقاۋىپ فاكتورلارىنان ارىلۋ ادىستەرىنە وقىتادى. پاسيەنتتەردە ەمدەۋ، تۇرمىستا جانە جۇمىستا دۇرىس مىنەز-قۇلىق كورسەتۋ ماسەلەلەرىنە وڭ كوزقاراس قالىپتاسادى.
«جۇرەك اۋرۋىنا شالدىققان ناۋقاستارعا مەديسينالىق وڭالتۋ مۇمكىندىگىنشە ەرتە باستالۋى ءتيىس. وڭالتۋ ءىس-شارالارى ستاسيونارلىق كەزەڭ اياقتالعاننان كەيىن تولىق كولەمدە ىسكە اسىرىلادى. دەنساۋلىقتى، جۇمىسقا قابىلەتتىلىكتى جاقسارتۋ، اۋرۋدىڭ اسقىنۋىنىڭ الدىن الۋ، پاسيەنتتەردى قوعامنىڭ قالىپتى ءومىر ءسۇرۋ جاعدايىنا بىرىكتىرۋ بويىنشا جۇمىستار ءوزىنىڭ اسەرىن بەرەدى»، - دەيدى دارىگەر.