فيلم اقاۋى بار ۇشاقتى جەرگە امان-ەسەن قوندىرعان قازاقستاندىقتار جايلى.
پورتۋگاليانىڭ اۆياسيالىق وقيعالاردى تەرگەۋ دەپارتامەنتى قازاقستاندىق ۇشقىشتاردىڭ اۆياسيالىق قاقتىعىسقا قاتىستى تەكسەرۋ جۇمىسىن اياقتادى. وتانداستارىمىز الەمدىك دەڭگەيدەگى حيۋ گوردون-بەرگ مەموريالدىق سىيلىعىمەن ماراپاتتالدى، دەپ حابارلايدى Almaty-akshamy.kz.
سونداي-اق National Geographic ارناسى «ۇشاق اپاتىن زەرتتەۋ» باعدارلاماسىنىڭ اۆتورلارى «باقىلاۋداعى اپات» دەپ اتالاتىن فيلم ءتۇسىردى. 40 مينۋتتىق تۋىندى اپاتتىڭ الدىن العان ەكيپاج كومانديرى ۆياچەسلاۆ اۋشيەۆ، ۇشقىش باۋىرجان قاراشولاقوۆ پەن سەرگەي سوكولوۆ تۋرالى. وندا قازاق ۇشقىشتارىنىڭ كاسىبيلىگىلىگىن كورسەتە وتىرىپ، تەحنولوگيانى جەتىك مەڭگەرۋ ارقىلى، ەكيپاجدى تۇگەل امان الىپ قالعانى بەينەلەنگەن.
ەسكە سالايىق، وسىدان 5 جىل بۇرىن پورتۋگاليادا تەحنيكالىق جوندەۋدەن وتكەن ۇشاق قازاقستانعا قايتۋ ءۇشىن كوككە كوتەرىلەدى. الايدا اۋە كەمەسىنىڭ ەلەروندارى دۇرىس ورناتىلماعاندىقتان، قالىپتى جۇمىس ىستەۋى قيىندايدى. ۇشقىشتار شۇعىل ارەكەت ەتىپ، اۋە كەمەسىن امان-ەسەن جەرگە قوندىردى.
«بىزگە ۇشاق باعىنبادى. ءبىزدىڭ ماقساتىمىز - ۇشاقتى كوبىرەك بيىكتىككە شىعارۋ بولدى. ەگەر ءبىز كوبىرەك بيىكتىككە كوتەرىلسەك، اقاۋدىڭ الدىن الۋعا سونشا مۇمكىندىك بولار ەدى. ۇشاق تولىق ءتورت رەت اينالدى اسپاندا. جەرگە قۇلاۋعا 10-15 سەكۋند قالعان شىعار، ۇشاق ءوز سالماعىنان 5 ەسە اۋىر كۇش پەن قىسىم ءتۇستى. ونداي كەزدە ۇشاق ەكىگە ءبولىنىپ كەتۋى دە مۇمكىن ەدى»، - دەيدى ۇشقىش باۋىرجان قاراشولاقوۆ.