پرەمەر-مينيستر ولجاس بەكتەنوۆ «Kazakh Tourism» ۇلتتىق كومپانياسى» اق باسقارما ءتوراعاسى تالعات عازيزوۆقا جاڭا قىزمەتىندە ناقتى ناتيجە كورسەتۋ كەرەگىن اشىق ايتتى، دەپ حابارلايدى Aqshamnews.kz ءتىلشىسى.
ۇكىمەت باسشىسى ناتيجە بولماسا، قىزمەتتەن كەتۋگە تۋرا كەلەتىنىن ەسكەرتتى.
بۇگىن ۇكىمەت وتىرىسىندا «Kazakh Tourism» باسشىسى ءتۋريزمدى دامىتۋ ماسەلەلەرى بويىنشا بايانداما جاسادى. وتىرىستىڭ سوڭىندا پرەمەر-مينيستر ول قىزمەتكە جاڭادان كەلگەنىن، ءبىراق ناقتى ناتيجە كۇتەتىنى تۋرالى ەسكەرتۋ جاسادى:
«تالعات جانات ۇلى، ءسىز بۇل قىزمەتكە جاڭادان كەلىپ وتىرسىز. ءبىراق وزىڭىزدەن ناقتى ناتيجە كۇتەمىز. ناتيجە بولسا، ءارى قاراي جۇمىس ىستەي بەرەسىز. ناتيجە بولماسا، قوشتاسامىز. كەلىستىك پە؟»
تالعات عازيزوۆ قىسقا جاۋاپپەن «كەلىستىك» دەدى.
ايتا كەتەيىك، تالعات عازيزوۆ 2026 جىلعى 16 قاڭتاردا «Kazakh Tourism» باسقارما ءتوراعاسى بولىپ تاعايىندالعان. بۇعان دەيىن ول 2023 جىلدان بەرى «قازپوشتا» اق باسقارۋشى ديرەكتورى – باسقارما مۇشەسى قىزمەتىن اتقارعان.