بالالاردى ۆاكسينالاۋ - بۇل وتە ماڭىزدى
الماتى قالالىق قوعامدىق دەنساۋلىق ساقتاۋ باسقارماسىنىڭ باسشىسى ناريمان تابىنبايەۆ مەكتەپتەردە ۆاكسينالاۋ ءۇشىن 12 جاستان اسقان بالالاردىڭ ءتىزىمى جاسالىپ جاتىر دەگەن اقپاراتتىڭ شىندىققا جاناسپايتىنىن ايتتى، دەپ حابارلايدى Almaty-akshamy.kz قازاقپارات سايتىنا سىلتەمە جاساپ.
«بالالاردى ۆاكسينالاۋ - بۇل وتە ماڭىزدى ماسەلە. ول اتا-انانىڭ رۇقساتىمەن ەرىكتى تۇردە جۇرگىزىلەدى. 12-17 جاس ارالىعىنداعى جاس قۇرامىنا تەك مەكتەپ وقۋشىلارى عانا ەمەس، سونىمەن قاتار 18 جاسقا تولماعان ءبىرىنشى كۋرس ستۋدەنتتەرى دە كىرەدى. ءبىز ءقازىر ءتىزىم دايىنداپ جاتقان جوقپىز، بۇل الىپ-قاشپا ءسوز دەپ سانايمىن. ءبىز ءتۇسىندىرۋ جۇمىستارىن باستاپ، اتا-انالار ەرىكتى تۇردە كەلىسىمىن بەرگەندە عانا ۆاكسينانى العىسى كەلەتىن قانشا بالا بار ەكەنىن بىلە الامىز»، - دەپ جاۋاپ بەردى ورتالىق كوممۋنيكاسيالار قىزمەتىندە وتكەن بريفينگتە ناريمان تابىنبايەۆ.