تەرەڭوزەك اۋىلىنىڭ ماڭىندا نايزاعاي ءتۇسىپ، ءبىر ءۇيىر جىلقى قىرىلىپ قالدى، دەپ حابارلايدى Almaty -akshamy. kz 24.kz-ke سىلتەمە جاساپ.
بۇل جامبىل وبلىسىنىڭ تۇرار رىسقۇلوۆ اۋدانىنداعى تاۋلى ايماق. جۇرتشىلىق ەندى اقادال مالىنىڭ اقىسىن كىمنەن وندىرەرىن بىلمەي دال. بۇعان زاڭ قالاي قارايدى؟ ماماندار نە دەيدى؟ نۇربولات مىرزاقۇلوۆ 20 جىلدان بەرى باقشا ەگىپ مال شارۋاشىلىعىمەن اينالىسادى. شارۋا وسىدان 2 جىل بۇرىن 3،5 ميلليون تەڭگە كولەمىندەگى جەڭىلدەتىلگەن نەسيەگە جىلقى ساتىپ الادى. ءبىراق وقىس وقيعادان 10 جىلقىسى ءولىپ، قوراسى قاڭىراپ قالدى. شارۋا مۇنداي جاعدايدىڭ ايماقتا العاش رەت بولعانىن ايتادى.
نۇربولاتپەن قوسا اۋىلداعى 7 ءۇيدىڭ 26 باس جىلقىسىن نايزاعاي سۇلاتىپ تۇسىرىگەن. ولگەن مالدىڭ قۇنىن كىمنەن داۋلارىن بىلمەي باسى قاتقان تۇرعىندار اۋدان اكىمدىگىنەن كومەك سۇراپ وتىر.
«ءبارىمىزدىڭ قاراپ وتىرعانىمىز ءبىر مال باسى ودان باسقا تۇگىمىز جوق ەندى شىنى كەرەك. برۋسەللەز بولسا اۋرۋ شىقسا مالعا، وعان اۋدان اكىمشىلىگى تولەۋشى ەدى. سونداي كومەك بولا ما دەگەن نيەتپەن. سول وتەماقى سول كومەك بىزگە وتە قاجەت بولىپ تۇر»، - دەيدى تەرەڭوزەك اۋىلىنىڭ تۇرعىنى جاندارحان مامىتبەكوۆ.
جەرگىلىكتى بيلىك وكىلدەرىنىڭ سوزىنشە، رەسمي توتەنشە جاعداي جاريالانعان جاعدايدا جانە مال اراسىندا جاپپاي اۋرۋ تاراعان كەزدە، شىعىندار مەملەكەت تاراپىنان وتەلەدى. ال قازىرگىدەي سيرەك جاعداي تەرەڭ زەردەلەۋدى قاجەت ەتەدى دەيدى.
«ءدال وسى ورىن العان جاعدايعا سايكەس. ول قانشالىقتى، قالاي ىسكە اسۋ كەرەك؟ ول ءۇشىن ارنايى اۋدان اكىمىنىڭ تاپسىرماسىمەن كوميسسيا قۇرىلعان. كوميسسيا قۇرامىنا قۇزىرلى ورگاندار مەن زاڭگەر ماماندار ەنگىزىلىپ وتىر. ءقازىر زەردەلەۋ جۇمىستارى جۇرگىزىلۋدە. ماسەلە اۋدان اكىمدىگىنىڭ تۇراقتى باقىلاۋىندا»، - دەيدى ت. رىسقۇلوۆ اۋدانى اكىمىنىڭ ورىنباسارى الىبەك تەرلىكبايەۆ.
ءقازىر اۋىلدىق اكىمدىك پەن ۆەتەرينارلاردان قۇرىلعان ارنايى جاساق، قانداي دا ءبىر اۋرۋ تاراماۋ ءۇشىن ولەكسەلەردى سول تاۋ شاتقالىندا كومىپ جاتىر. سەبەبى جىلقىلار جايىلعان بيىكتىككە كولىكپەن جەتۋ مۇمكىن ەمەس.