ەۋروپادا قازاق تىلىنە سۇرانىس كۇننەن كۇنگە ارتىپ كەلەدى

بەلگيالىق ستۋدەنت  ستەين رومبوۋت 5 جىلدان بەرى قازاقشانى عالامتوردان ۇيرەنىپ ءجۇر،  دەپ حابارلايدى Almaty -akshamy. kz.

2018ء-دىڭ جازىندا ەلگە العاش ساپارلاپ، الماتى، شىمكەنت پەن تۇركىستاندى اسىقپاي ارالاعان. ۇلى دالا ەلىنە، قازاق تىلىنە دەگەن ماحاببات سول ساپاردا وياندى، دەيدى ءوزى.

«قازاقستان وتە قىزىقتى ەل. مەن قازاقستاندى جاقسى كورەمىن. بەس جىل بۇرىن قازاقستانعا تۋريست رەتىندە باردىم. ماعان قازاق تابيعاتى قاتتى ۇنادى. قازاقتار دا وتە قوناقجاي»،  - دەيدى «Ku leuven» ۋنيۆەرسيتەتىنىڭ ستۋدەنتى ستەين رومبوۋت.

قازاقتىڭ مادەنيەتى مەن تاريحىنا تەرەڭ بويلاعىسى كەلەتىن ستەيننىڭ قازاقشا اتى-سىرىم. سىرىم دات ۇلى سياقتى باتىر، باتىل بولسام دەپ وسى ەسىمدى تاڭداعانىن ايتادى. عالامتوردان قازاق ءتىلىن ۇيرەنگەلى ابايدىڭ شىعارمالارىن قازاقشا وقۋعا تىرىسىپ ءجۇر.

«مەن تۇرىكشە بىلەمىن، سوندىقتان قازاق ءتىلىن ۇيرەنۋ ونشا قيىن ەمەس. ءبىراق، ءالى دە گرامماتيكا قيىن بولۋى مۇمكىن. وقۋلىعىم بار. كۇنىنە ەلۋ ءسوز قايتالايمىن. ماعان «ءماسساعان» دەگەن ءسوز ۇنايدى»،  - دەيدى ستەين.
تۇرىك، فرانسۋز، نيدەرلاند، اعىلشىن، جۇڭگو، البان تىلدەرىن بىلەتىن سىرىمنىڭ ەندىگى ارمانى-قازاق ءتىلىن جەتىك مەڭگەرۋ. ماقساتىنا قول جەتكىزۋ ءۇشىن ءقازىر بەلگياداعى قازاق جاستارىمەن دوستاسىپ، قازاقشا سويلەسىپ ءجۇر. بولاشاقتا قازاقستاندا تۇرىپ، ءبىراز جىل ءتىل مامانى رەتىندە جۇمىس ىستەگىسى كەلەدى.