الماتىداعى ن.ساس اتىنداعى بالالار تەاترىندا «مادەنيەت جانە ۇلتتىق سالت ءداستۇر» كۇنىنە وراي 200 جۋىق دومبىراشى جينالىپ، قازاق كۇيلەرىن ورىندادى.
كەڭ دالانى مەكەن ەتكەن قازاق جۇرتىنىڭ ەڭ اياۋلى دا قاسيەتتى مۋزىكالىق اسپابى دومبىرانىڭ بىردە كۇمبىرلەگەن، بىردە شەرتىلگەن ويلى دىبىسى قۇلاققا جاعىمدى، جۇرەككە جاقىن، ونىڭ كۇمىستەي سىڭعىرلاعان ءۇنى تالاي سىردىڭ باسىن قايىرادى. سىمداي تارتىلعان قوس ىشەكتەن سان عاسىردىڭ سان الۋان سيپاتى اقىل-ويى، كوڭىل كۇيى جاتىر. دومبىرا – كوشپەلى ەلدىڭ كونەكوز شەجىرەسى، كوپتى كورگەن قاريانىڭ كوكىرەك كۇيى.
مەرەكەلىك ءىس-شارادا مەملەكەتتىك “دامۋ بالا” باعدارلاماسى اياسىندا ۇيىرمەگە قاتىسۋشى وقۋشىلار جينالىپ، “اداي”، “ەركە سىلقىم”، “بالبىراۋىن” سياقتى تانىمال تۋىندىلاردى ورىندادى.
نەگىزى مۇنداي شارالار كەلەشەك ۇرپاقتى ۇلتتىق قۇندىلىقتارىمىزدى قادىرلەۋگە تاربيەلەيدى. سونىمەن قاتار، وسى اكسيانىڭ ارقاسىندا دومبىرا ۇيرەنۋگە دەگەن جاستاردىڭ قىزىعۋشىلىعى ارتارى انىق.
ەسكە سالا كەتەيىك، بيىل ءاز-ناۋرىز مەرەكەسى جىلداعىدان ەرەكشە وتۋدە. ەندەشە اتادان-بالاعا مۇرا بولىپ سارقىلماي جەتكەن ۇلتتىق قۇندىلىقتارىمىزدى ءالى دە جانداندىرا، جارقىراتا ءتۇسۋىمىز كەرەك ىسپەتتى!
