ەلىمىزدە «ناگرادتالعان انالار» دەگەن جاڭا ۇعىم پايدا بولادى.
تولىعىراق ۇكىمەت باسشىسى ءاليحان سمايىلوۆ ايتىپ بەردى، دەپ حابارلايدى Almaty-akshamy.kz قازاقپاراتقا سىلتەمە جاساپ.
«مەملەكەت ءوز كەزەگىندە ايەلدەردى الەۋمەتتىك قولداۋ ماسەلەلەرىنە ەرەكشە نازار اۋدارىپ وتىر. انا مەن بالانى قورعاۋ، كاسىپكەر ايەلدەردى قولداۋ، كوپ بالالى انالارعا، بالا اسىراپ العان وتباسىلارعا كومەك كورسەتۋ، ايەلدەردى جۇمىسپەن قامتۋعا جاردەمدەسۋ، قاريالارعا قامقورلىق جاساۋ مەملەكەتتىك ساياساتتىڭ ماڭىزدى باعىتتارى بولىپ قالا بەرەدى»، - دەدى ءاليحان سمايىلوۆ ۇكىمەت وتىرىسىندا.
سونداي-اق، پرەمەر-مينيستر جىل باسىنان بەرى بالا كۇتىمى بويىنشا جاردەماقى تولەۋ مەرزىمىنىڭ 1 جىلدان 1،5 جىلعا ۇزارعانىن ايتتى.
«الەۋمەتتىك كودەكستە «ناگرادتالعان انالار» دەگەن جاڭا ۇعىم ەنگىزىلەدى. بۇل مارتەبە كوپ بالالى انالاردى قۇرمەتتەپ، ولاردىڭ ەڭبەگىن دارىپتەۋ ماقساتىندا «كۇمىس القامەن»، «التىن القامەن» ماراپاتتالعان، بۇرىن «باتىر انا» اتاعىن العان، «انا داڭقى» وردەندەرىمەن ماراپاتتالعان ايەلدەرگە بەرىلەدى. ماراپاتتالعان انالار ءۇشىن جاردەماقى مولشەرى سارالانىپ، ۇلعايتىلادى»، - دەيدى ول.
ونىڭ ايتۋىنشا، شامامەن 90 مىڭ انا جوعارىدا اتالعان يگىلىككە يە بولادى.