قارۋلى كۇشتەردەگى اسكەري بولىمدەردە جاس ساربازدار وتان الدىندا ادال قىزمەت ەتۋگە انت بەردى، دەپ حابارلايدى Almaty-akshamy.kz Inform.kz-كە سىلتەمە جاساپ.
اۋە شابۋىلىنا قارسى قورعانىس اسكەرلەرىندە انت بەرۋ ءراسىمى ولاردىڭ قۇرىلعانىنا 30 جىل تولۋىمەن تۇسپا-تۇس كەلدى. جالپى، اسكەري دايىندىق كۋرسىنان جانە انت قابىلداعاننان كەيىن جاس بۋىن ەلدىڭ اۋە شەپتەرىن قورعاۋعا قاجەتتى اسكەري-ەسەپتىك ماماندىقتاردى يگەرۋگە كىرىسەدى. سونداي-اق، ۇلتتىق قورعانىس ۋنيۆەرسيتەتىنىڭ بىرەگەي بولىمشەلەرىنىڭ ءبىرى بولىپ سانالاتىن اسكەري-عىلىمي ۆزۆودىنىڭ مەرزىمدى قىزمەتتەگى اسكەري قىزمەتشىلەرى دە وتانعا ادال بولۋعا انت بەردى. ولاردىڭ نەگىزگى مىندەتى – ينجەنەرلىك-تەحنيكالىق بەيىندەگى، ءىت تەحنولوگيالار مەن كيبەرقاۋىپسىزدىك باعىتتارى بويىنشا عىلىمي جۇمىس اتقارۋ.
اسكەري-عىلىمي ۆزۆودتىڭ اسكەري قىزمەتشىلەرى وزدەرىنىڭ كۇندەلىكتى قىزمەتىندە جاۋىنگەرلىك دايارلىقتىڭ نەگىزگى پاندەرىن يگەرۋدەن باسقا قارۋلى كۇشتەردىڭ يگىلىگى ءۇشىن عىلىمي-زەرتتەۋ، تاجىريبەلىك-كونسترۋكتورلىق جانە سىناق جۇمىستارىن ورىنداۋعا تارتىلادى.
«ەلىمىزدىڭ جەتەكشى اسكەري جوعارى وقۋ ورنى – ۇلتتىق قورعانىس ۋنيۆەرسيتەتىنە قىزمەت ەتۋگە كەلگەنىمدى ماقتان تۇتامىن جانە وتان الدىنداعى كونستيتۋسيالىق پارىزىمدى لايىقتى ورىنداۋ ءۇشىن بار كۇش-جىگەرىمدى سالامىن. بۇل ءۇشىن مەنىڭ اسكەرگە بارار الدىندا العان عىلىمي-تەحنيكالىق باعىتتاعى تاجىريبەم مەن ءبىلىمىم بار»، – دەيدى قاتارداعى جاۋىنگەر ارتەم ەگوروۆ.
سالتاناتتى ءىس-شارالارعا قارۋلى كۇشتەردىڭ ارداگەرلەرى، ينتەرناسيوناليست-جاۋىنگەرلەر، ساربازداردىڭ تۋعان-تۋىستارى قاتىستى. انت قابىلداعاننان كەيىن ءداستۇر بويىنشا بولىمشە كومانديرلەرى اتا-انالارمەن اڭگىمەلەستى. قىزىقتىرعان سۇراقتارىنا جاۋاپ بەرىپ، ولاردى اسكەري بولىمدەردىڭ ينفراقۇرىلىمىمەن تانىستىردى، كازارمالار، اسحانالار مەن وقۋ سىنىپتارىن كورسەتتى.