مىڭنان استام ەل تۇرعىنى اتىس قارۋىن ءوز ەركىمەن تاپسىردى

ەلىمىزدىڭ ءبىرقاتار وڭىرىندە ەل تۇرعىندارىنان اتىس قارۋىن، وق-دارىلەر مەن جارىلعىش زاتتاردى ساتىپ الۋ اكسياسى اياقتالدى.

بۇل تۋرالى ىشكى ىستەر مينيسترلىگىنىڭ وكىلى شۇعىلا تۇرلىبەك ايتتى، دەپ حابارلايدى Almaty-akshamy.kz قازاقپاراتقا سىلتەمە جاساپ. 

«قوعامدىق قاۋىپسىزدىكتى قامتاماسىز ەتۋ جانە اتىس قارۋىن قولدانا وتىرىپ جاسالاتىن قىلمىستاردىڭ الدىن الۋ ماقساتىندا ءىىم جىل سايىن حالىقتان زاڭسىز ساقتالعان اتىس قارۋىن، وق-دارىلەر مەن جارىلعىش زاتتاردى ساتىپ الۋ بويىنشا اكسيالار وتكىزەدى. بيىل اتالعان اكسيا 25 ساۋىردە باستالدى، بۇل ماقساتقا رەسپۋبليكالىق بيۋدجەتتەن 88،7 ملن تەڭگە ءبولىندى»، - دەدى ءىىم وكىلى ۆەدومستۆونىڭ باسپا ءسوز قىزمەتى الاڭىندا وتكەن بريفينگتە.

ونىڭ دەرەگىنشە، ءىس-شارا قورىتىندىسىنا سايكەس، ىشكى ىستەر ورگاندارىنا 1 مىڭنان استام ازامات جۇگىندى. ولار 1،3 مىڭ اتىس قارۋىن، 9 مىڭنان استام ويىق قارۋ پاتروندارىن ءوز ەركىمەن تاپسىردى.

«بولىنگەن قاراجاتتىڭ يگەرىلۋىنە بايلانىستى اكسيا نۇر-سۇلتان، الماتى، شىمكەنت قالالارىندا، اقمولا، الماتى، اتىراۋ، جەتىسۋ، باتىس قازاقستان، قاراعاندى، قوستاناي، تۇركىستان، سولتۇستىك قازاقستان، پاۆلودار، ۇلىتاۋ وبلىستارىندا اياقتالدى. ءىىم حالىقتان قارۋ-جاراق زاتتارىن ساتىپ الۋ بويىنشا ءىس-شارالاردى 2008 جىلدان بەرى وتكىزىپ كەلە جاتقانىن اتاپ ءوتۋ قاجەت. وسى كەزەڭدە ازاماتتار ءوز ەركىمەن جالپى 54 مىڭنان استام اتىس قارۋىن، 2 ملن-نان استام ويىق قارۋ پاتروندارىن تاپسىرعان»، - دەدى شۇعىلا تۇرلىبەك.