اۋىل تۇرعىندارى ەل ءتۋريزمىن دامىتۋعا ۇلەس قوسىپ ءجۇر

Welcome to Kazakhstan! الماتى جانە جەتىسۋ وبلىستارىنا كەلەتىن شەتەلدىك تۋريستەر قوناقۇيلەردەن گورى قازاقتىڭ كيىز ۇيىنە قونعاندى ءجون سانايدى.

وسىلايشا ەلىمىزدىڭ مادەنيەتى مەن تاريحىن تەرەڭىرەك تانۋعا تىرىسادى. قازاقتىڭ تۇمسا تابيعاتىن تاماشالاۋعا كەلگەن شەتەلدىكتەرگە اۋىل تۇرىندارى كومەكتەسۋدە، دەپ حابارلايدى Almaty-akshamy.kz Qazaqtv.com سايتىنا سىلتەمە جاساپ. 

اۋىل مەكتەبىندە ءمۇعالىم بولىپ ىستەيتىن ارداق وماروۆانىڭ تۋريستىك بيزنەستىڭ قىر-سىرىن ۇيرەنىپ، قوناق ءۇي اشقانىنا 4 جىل بولدى. ءبىر ۋاقىتتا 18 ادامدى قابىلداي الادى. اۋلاعا كيىز ءۇي ورناتقان. مۇندا مەيماندارعا ەت، قۇرت، باۋىرساق، قىمىز، شۇبات سەكىلدى ۇلتتىق تاعامدار ۇسىنادى. وسى جىلدارى قوناق ۇيدە الەمنىڭ 60 ەلىنەن كەلگەن تۋريستەر توقتاعان.

« 2018 جىلى باستادىم. 2019 جىلى جاقسى جۇمىس جاسادىق. تەك قانا شەتەلدىك تۋريستەرمەن. 2020 جىلى پاندەميا بولىپ كەتتى عوي. سول كەزدە كىشكەنە توقتاپ قالدى بيزنەسىمىز. ءالى دە جالعاستىرامىز. ءالى دە جۇمىس جاسايمىز. ماعان ءوزى قوناق كۇتكەن وتە ۇنايدى»، - دەيدى اۋىل تۇرعىنى ارداق وماروۆا. 

«مەنىڭ مۇندا كەلگەنىمە 10 كۇننەن استى. ساياحاتتان العان اسەرىمدى اۋىزبەن ايتىپ جەتكىزۋ مۇمكىن ەمەس. قازاق قوناقجاي دەگەندى ەستۋشى ەدىم، وسى جولى ءتانتى بولدىم. ۇلتتىق تاعامدارىڭىزدىڭ ءدامى ءتىل ۇيىرەدى. ال تابيعاتى قانداي تاماشا! جەر بەتىندەگى جۇماق مەكەن دەسەم ارتىق ايتقانىم ەمەس»، - دەيدى يتاليادان كەلگەن ساياحاتشى دجوردجو لەوني.