تۇركىستاننىڭ باي تاريحى تۋرالى باياندايتىن «مىڭجىلدىقتار توعىسىنداعى تۇركىستان» كورمەسىنىڭ سالتاناتتى اشىلۋى بۇگىن قازاقستان رەسپۋبليكاسىنىڭ ۇلتتىق مۋزەيىندە ءوتتى، دەپ حابارلايدى almaty-akshamy.kz
رەسپۋبليكا كۇنى مەن تۇركى مەملەكەتتەرى ۇيىمىنىڭ 10-شى مەرەيتويلىق سامميتىنە ورايلاستىرىلعان ءىس-شارانى قازاقستان رەسپۋبليكاسى مادەنيەت جانە اقپارات مينيسترلىگى ۇيىمداستىردى. كورمەنىڭ ماقساتى – دالا مادەنيەتىنىڭ الەمدىك وركەنيەتتەگى ەرەكشە ورنىن كورسەتۋ، تۇركى مادەني مۇراسىن كەڭىنەن ناسيحاتتاۋ، تۇركى مەملەكەتتەرى اراسىنداعى مادەني ىنتىماقتاستىقتى ودان ءارى تەرەڭدەتۋ.
ءىس-شارانىڭ اشىلۋ سالتاناتىنا پارلامەنت دەپۋتاتتارى، جوعارى وقۋ ورىندارىنىڭ رەكتورلارى، تاريح جانە فيلولوگيا عىلىمدارىنىڭ دوكتورلارى، پروفەسسورلار، مۇراجاي مەن كىتاپحانا وكىلدەرى قاتىستى.
قاتىسۋشىلار 3 بولىمنەن تۇراتىن «تاريحى تەرەڭ تۇركىستان»، «تۇركىستان-تۇركى الەمىنىڭ رۋحاني ورتالىعى»، «جوشى ۇلىسىنان (ۇلىق ۇلىس) قازاق حاندىعىنا دەيىن» ەكسپوزيسيامەن تانىستى.
XIV عاسىرعا جاتاتىن ەكسپوناتتار قوجا احمەت ياساۋي كەسەنەسى قۇرىلىسىنىڭ تاريحى مەن ەرەكشەلىكتەرى تۋرالى باياندايدى، سونداي-اق كەلۋشىلەر شىڭعىس حان كەزەڭىنىڭ، جوشى ۇلىسى (ۇلىق ۇلىس) ءداۋىرىنىڭ جانە قازاق حاندىعىنىڭ ساۋلەتتىك جانە نۋميزماتيكالىق ەكسپوناتتارىن تاماشالادى. جالپى، كورمەدە بىرنەشە تاريحي حرونولوگيالىق كەزەڭدەر قامتىلعان.
كورمەگە بارلىعى «ازىرەت سۇلتان» مەملەكەتتىك تاريحي-مادەني مۇراجاي-قورىعىنىڭ تاريحىنان سىر شەرتەتىن 130-عا جۋىق بىرەگەي جادىگەرلەر قويىلعان. ولاردىڭ ءارقايسىسى تاريحتىڭ ءبىر ءۇزىندىسىن عانا ەمەس، سول زاماننىڭ رۋحىن دا الىپ ءجۇر.
قوجا احمەت ياساۋي كەسەنەسى ورنالاسقان تۇركىستان - ەڭ كونە قالا، تۇركى وركەنيەتىنىڭ رۋحاني الەمىندە ەرەكشە ورىن الادى. بۇل ۇلى شەديەۆر يۋنەسكو-نىڭ بۇكىلالەمدىك مۇرا تىزىمىنە ەنگەن ساتتەن باستاپ جيىرما جىل ءوتتى.