مىلتىقپەن تۇسكەن فوتوسى ءۇشىن ءىستى بولدى

شقو-دا كوللەدجدىڭ 16 جاسار ستۋدەنتىنەن تەگىس ۇڭعىلى مىلتىق تاركىلەندى

كامەلەتكە تولماعان بالا 2021 جىلدىڭ قازان ايىندا ءۇيىنىڭ شاتىرىنان قاپقا ورالعان مىلتىق تاۋىپ العانىن اناسىنا ايتىپ بەرگەن. پوليسەيلەر الەۋمەتتىك جەلىلەردى تەكسەرۋ بارىسىندا قارۋدى زاڭسىز ساقتاعان ءجاسوسپىرىمدى انىقتاعان، ول ءوز اككاۋنتىندا مىلتىقپەن تۇسكەن سۋرەتىن جۇكتەپ قويعان، دەپ حابارلايدى Almaty-akshamy.kz altaynews.kz سايتىنا سىلتەمە جاساپ.

مەكەن-جايعا كەلگەن پوليسەيلەر كامەلەتكە تولماعان بالانىڭ ۇيىنەن وسى مىلتىقتى تاركىلەگەن. ساراپشىنىڭ قورىتىندىسىنا سايكەس، بۇل قارۋ 12 كاليبرلى اڭشىلىق پاتروندارمەن اتۋ ءۇشىن جارامدى جانە 12 كاليبرلى تەگىس ۇڭعىلى اتىس قارۋى بولىپ تابىلادى.

«ق ر ءىىم بدب بازاسىنىڭ ەسەبى بويىنشا اتالعان مىلتىق تىركەلگەن جانە كريمينالدىق قارۋ رەتىندە كورسەتىلمەيدى. كامەلەتكە تولماعان 37 جاستاعى اناسىنا قاتىستى ق ر اقبتك - ءنىڭ 482-بابىنىڭ 1-بولىگى «جەكە جانە زاڭدى تۇلعالاردىڭ قارۋدى زاڭسىز يەلەنۋى، بەرۋى، وتكىزۋى، ساقتاۋى، الىپ ءجۇرۋى، تاسىمالداۋى» بويىنشا اكىمشىلىك حاتتاما تولتىرىلىپ، ونىڭ سانكسياسىمەن 20 اەك مولشەرىندە اكىمشىلىك ايىپپۇل كوزدەلگەن»، - دەپ حابارلايدى شقو پد باسپا ءسوز قىزمەتى.

ايتا كەتەيىك، وبلىس اۋماعىندا «قۇقىقتىق ءتارتىپ» رەسپۋبليكالىق جەدەل-الدىن الۋ ءىس-شاراسى ءوتىپ جاتىر.
ءىس-شارا باستالعاننان بەرى زاڭسىز الىپ ءجۇرۋ مەن ساقتاۋدىڭ 10 فاكتىسى انىقتالدى.