براكونەرلەردەن ءنومىرسىز قارۋ تاركىلەندى
ىلە-الاتاۋى مەملەكەتتىك ۇلتتىق تابيعي پاركىنىڭ قىزمەتكەرلەرى ءسىبىر ەلىگىن اتقان براكونەرلەردى ۇستادى، دەپ حابارلايدى Almaty-akshamy.kz ق ر ەگترم ورمان شارۋاشىلىعى جانە جانۋارلار دۇنيەسى كوميتەتىنىڭ باسپا ءسوز قىزمەتىنە سىلتەمە جاساپ.
«2022 جىلدىڭ 28 قاڭتارىندا «ىلە-الاتاۋى مۇتپ» رمم تۇرگەن فيليالىنىڭ ينسپەكتورلارى ساعات 14:00 شاماسىندا ءسىبىر ەلىگىن (اتالىق) اتقان ءۇش براكونەردى ۇستادى. تۇرگەن فيليالىنىڭ ينسپەكتورلارى ە.جىلسبايەۆ، ك. قۇماربەكوۆ، ءا. سەرىكجان، م. بايتاسوۆ ەسىك ورمانشىلىعىنىڭ №9 ورام اۋماعىن بارلاۋ بارىسىندا ءسىبىر ەلىگىن بولشەكتەپ جاتقان براكونەرلەردىڭ ۇستىنەن تۇسكەن. ناتيجەسىندە زاڭسىز اڭ اتقان قازاقستان رەسپۋبليكاسىنىڭ ءۇش ازاماتى ۇستالدى»،-دەلىنگەن حابارلامادا.
ينسپەكتورلاردىڭ ايتۋىنشا، وقيعا ورنىندا ءسىبىر ەلىگىنىڭ بولشەكتەلگەن ەتى، باسى، تەرىسى جانە ىشەك-قارىنى جاتقان.
«ۇستاۋ كەزىندە قۇقىق بۇزۋشىلاردان كاليبرى 7،62 ۆەپر-308 ماركالى (ءنومىرى سا9615) مىلتىعى جانە ءنومىرسىز، قايتا جاسالعان ەكى قارۋ تاركىلەندى. قۇقىق بۇزۋشىلار الماتى وبلىسى ەڭبەكشىقازاق اۋدانىنىڭ پوليسيا بولىمىنە جەتكىزىلدى. ءقازىر سوتقا دەيىنگى تەرگەپ-تەكسەرۋ امالدارى جۇرگىزىلىپ جاتىر»،-دەلىنگەن حابارلامادا.
ەستەرىڭىزگە سالا كەتەيىك، اتالعان قۇقىق بۇزۋشىلىق ءۇشىن قىلمىستىق جاۋاپكەرشىلىك قاراستىرىلعان. «ەرەكشە قورعالاتىن تابيعي اۋماقتار تۋرالى» ق ر زاڭىنا سايكەس ەرەكشە قورعالاتىن تابيعي اۋماقتاردا اڭ اۋلاۋعا تىيىم سالىنعان.