الماتىنىڭ ءومىرى مادەني ءىس-شاراعا تولىقتى. وسىمەن 20-رەت ۇيىمداستىرىلعالى وتىرعان «مۋزەي ءتۇنى» ونەر مەن تاريحتىڭ جارشىسىنا اينالماق
قازاقستان رەسپۋبليكاسىنىڭ ورتالىق مەملەكەتتىك مۋزەيىندە 17 مامىر كۇنى كەشكىسىن مادەني مەرەكە — «مۋزەي ءتۇنى – 2025» وتەدى. بۇل – حالىقارالىق مۋزەي كۇنى قارساڭىندا ءداستۇرلى تۇردە ۇيىمداستىرىلاتىن، ەلىمىزدىڭ ونەرى مەن باي مۇراسىن قۇرمەتتەيتىن ازاماتتاردى بىرىكتىرەتىن ايتۋلى ءىس-شارا. بيىلعى «مۋزەي ءتۇنى» — مەرەكەنىڭ 20 جىلدىعىنا ورايلاستىرىلىپ وتىرعاندىقتان، بۇرىنعىدان دا مازمۇندى ءارى قىزىقتى بولماق.
الماتى وڭىرلىك كوممۋنيكاسيالار قىزمەتىندە وتكەن بريفينگتە مۋزەي باسشىلىعى اتالعان كۇنگى ءىس-شارالار باعدارلاماسىمەن ءبولىستى.
قازاقستان رەسپۋبليكاسىنىڭ ورتالىق مۋزەيى الماتىلىقتار مەن قالا قوناقتارىن تىڭ دۇنيەلەرمەن قارسى الماق. 18:00-دەن 23:00-گە دەيىن جالعاساتىن «مۋزەي – تاريحتىڭ ايناسى: قازىرگى قوعامداعى مۋزەيدىڭ ورنى» اتتى مازمۇندى باعدارلاما كورەرمەندەر نازارىنا ۇسىنىلادى. وسىنىڭ اياسىندا الەۋمەتتىك، تەحنولوگيالىق جانە ەكولوگيالىق وزگەرىستەر بەلەڭ الىپ وتىرعان زاماندا رۋحاني ءارى مادەني داستۇرلەردىڭ ماڭىزدىلىعى باياندالماق.
مۋزەيدەگى نەگىزگى باعىتتار «مۋزەي – رۋحاني وشاق» جانە «ەرلىك پەن مەملەكەتشىل مىنەز – ەگىز ۇعىم» تاقىرىپتارىمەن ءوربيدى. شارا بارىسىندا شوقان ءۋاليحانوۆتىڭ 190 جىلدىعىنا، نۇرعيسا تىلەندييەۆتىڭ 100 جىلدىعىنا، سونداي-اق مۋزىكاتانۋشىلار احمەت جۇبانوۆ پەن عازيزا جۇبانوۆانىڭ مۇراسىنا ارنالعان كورمەلەر مەن تانىمدىق دۇنيەلەر وتەدى.
«سول كۇنى ۇلى وتان سوعىسىنىڭ قاھارماندارى مانشۇك مامەتوۆا مەن بوران نىسانبايەۆتىڭ مەموريالدىق مۋزەيلەرى قاتىساتىن «مۋزەي شەرۋى» ۇيىمداستىرىلادى»، – دەپ حابارلادى ق ر ورتالىق مەملەكەتتىك مۋزەيى ديرەكتورىنىڭ مىندەتىن اتقارۋشى سەرجان باراحان ۇلى.
قوناقتار نازارىنا ۇسىنىلاتىن باستى شارالار:
• شوقان ءۋاليحانوۆتىڭ 190 جىلدىعىنا ارنالعان التىنەمەلدەگى مەموريالدىق مۋزەي كورمەسى؛
• م. كەنبايەۆتىڭ، ءمۇسىنشى ح. ناۋرىزبايەۆتىڭ جانە باسقا دا ونەر يەلەرىنىڭ 100 جىلدىعىنا ارنالعان «شابىت جاڭعىرىعى» اتتى مەرەيتويلىق ەكسپوزيسيا؛
• سۋرەتشى يۋريي پروسكۋردىڭ «كوشپەندىنىڭ جان-دۇنيەسى» اتتى جەكە كورمەسى؛
• توتە جازۋ، لاتىن جانە كيريلليسا گرافيكاسىمەن جازىلعان حاتتاردىڭ پوشتا ماركالارى، مورزە اپپاراتى جانە زاماناۋي كوممۋنيكاسيا قۇرالدارىمەن بايلانىسىن كورسەتەتىن ەرەكشە كورمە. مۇندا ش. ءۋاليحانوۆ، ا. قۇنانبايەۆ، ءا. مارعۇلان، م. اۋەزوۆ سىندى تۇلعالاردىڭ حاتتارى مەن قۇجاتتارىنىڭ كوشىرمەلەرى، سونداي-اق قاراپايىم حالىقتىڭ ە. ءومىرزاقوۆقا، ءى. ەسەنبەرلينگە، م. عابدۋللينگە جازعان حاتتارى دا كورەرمەن نازارىنا ۇسىنىلادى.
كورمەنىڭ ەڭ ەرەكشە بولىگى — مۋزەي قورىنداعى سيرەك جادىگەرلەر قويىلاتىن «قوردىڭ جاۋھارى» اتتى ەكسپوزيسيا. سونىمەن قاتار، قوناقتار گۆارنەري مەن ستراديۆاري شەبەرلەرىنىڭ ونەر تۋىندىلارىمەن تانىسىپ، كلاسسيكالىق مۋزىكا مەن ۇلتتىق اسپاپتاردىڭ اۋەزدى سازىنا قانىعا الادى.
بۇدان بولەك، احمەت جۇبانوۆ، عازيزا جۇبانوۆا جانە نۇرعيسا تىلەندييەۆتىڭ مەموريالدىق مۋزەيلەرىنىڭ ەكسپوناتتارى دا ۇسىنىلادى.
مەرەكەلىك باعدارلاما اياسىندا مۋزەيدىڭ عىلىمي كىتاپحاناسىندا «ءبىلىم جۇيەسىن دامىتۋ»، «وتباسى حرەستوماتياسى» اتتى كىتاپ جارمەڭكەسى، سونداي-اق «ونەردىڭ قۇدىرەتتى كۇشى» اتتى قولونەر شەبەرلەرىنىڭ كورمە-جارمەڭكەسى ۇيىمداستىرىلادى.
«حالىقارالىق مۋزەي كۇنى اياسىندا يران يسلام رەسپۋبليكاسىنىڭ الماتىداعى مادەني وكىلدىگى «يراننىڭ ءداستۇرلى مادەنيەتى مەن ونەرى» اتتى كورمە وتكىزەدى. قوناقتار پارسى كالليگرافياسىمەن تانىسىپ، يسفاھاننان ارنايى كەلگەن شەبەرلەر — نافيسا ورۋدجي، ءماريام جافاري جانە حوسسەين حۋشباتەنمەن تىكەلەي تىلدەسە الادى»، – دەپ تولىقتىردى سەرجان باراحان ۇلى.
سونىمەن قاتار، كەلۋشىلەرگە رەستاۆراسيا بويىنشا شەبەرلىك ساعاتتارعا قاتىسۋ، عىلىمي ينتەراكتيۆتەرگە ارالاسۋ، مۋزەي كۆەستتەرى مەن تانىمدىق ويىندارعا قاتىسۋ مۇمكىندىگى دە ۇسىنىلادى.
«مۋزەي ءتۇنى-2025» — قازاقستاننىڭ باي مادەنيەتىن سەزىنىپ، ونىڭ رۋحاني مۇراسىمەن تانىسقىسى كەلگەندەردىڭ تانىم-تۇسىنىگىن ارتتىراتىن تاماشا مۇمكىندىك.