قازاقستان رەسپۋبليكاسى پرەمەر-مينيسترىنىڭ ورىنباسارى – سىرتقى ىستەر ءمينيسترى مۇرات نۇرتىلەۋ ۆاشينگتونعا ساپارى اياسىندا اقش ساۋدا وكىلى كەترين تايمەن كەلىسسوزدەر جۇرگىزدى.
كەزدەسۋ بارىسىندا مينيستر ق ر جاڭا ۇكىمەتىنىڭ باسىمدىقتارى، ساۋدا قاتىناستارىنىڭ اعىمداعى سەرپىنى جانە وڭىردەگى ازىق-تۇلىك قاۋىپسىزدىگىن قامتاماسىز ەتۋ جونىندەگى شارالار تۋرالى حاباردار ەتتى.
م.نۇرتىلەۋ قازاقستان اقش-تىڭ سەنىمدى ساۋدا سەرىكتەسى ەكەنىن اتاپ ءوتىپ، امەريكالىق ساۋدا وكىلىن استانا حالىقارالىق فورۋمىنا قاتىسۋعا شاقىردى.
ك.تاي قازاقستان ەكونوميكاسىنىڭ دامۋ قارقىنىن جوعارى باعالاپ، ەكىجاقتى ىنتىماقتاستىقتى سىندارلى تۇرعىدا قالىپتاستىرۋعا بەيىلدىلىگىن اتاپ ءوتتى.
دۇنيەجۇزىلىك ساۋدا ۇيىمى شەڭبەرىندە ەلىمىزدىڭ قۇراما شتاتتارىمەن ءوزارا ءىس-قيمىلىنىڭ جوعارى دەڭگەيىنە، سونداي-اق اتالعان ۇيىمعا ءوڭىر ەلدەرىنىڭ كىرۋ بويىنشا قازاقستاننىڭ كۇش-جىگەرىن قولداۋعا ەرەكشە نازار اۋدارىلدى.
تاراپتار ق ر مەن ءوڭىردىڭ ترانزيتتىك-كولىكتىك بايلانىسىن دامىتۋ بويىنشا جوعارى الەۋەتتى اتاپ ءوتتى.
بۇدان باسقا قازاقستان تاراپىنىڭ باستاماسى بويىنشا ورتالىق ازيا ەلدەرى مەن اقش اراسىنداعى ساۋدا جانە ينۆەستيسيالار جونىندەگى نەگىزدەمەلىك كەلىسىم (TIFA) بويىنشا كەڭەستىڭ الداعى وتىرىسىن استانا قالاسىندا وتكىزۋ تۋرالى ۋاعدالاستىققا قول جەتكىزىلدى.
سۇحبات سوڭىندا تاراپتار ەكىجاقتى جانە كوپجاقتى فورماتتا نەگىزگى ماسەلەلەر بويىنشا ديالوگتى جالعاستىرۋعا، سونداي-اق وڭىرلىك جەتكىزۋ تىزبەگىن نىعايتۋ ءۇشىن امەريكالىق سەرىكتەستەردىڭ تاجىريبەسىن قولدانۋعا كەلىستى.
سونىمەن قاتار ساپار بارىسىندا ق ر ءسىم باسشىسى امەريكالىق «Wabtec» كومپانياسىنىڭ باسشىلىعىمەن كەزدەسۋ وتكىزىپ، ونىڭ بارىسىندا كولىك جانە ونەركاسىپ سالاسىنداعى ىنتىماقتاستىقتى كەڭەيتۋ، قازاقستاندا كومپانيانىڭ ينجەنەرلىك ورتالىعىن اشۋ، سونداي-اق «بولاشاق» ستيپەنديالىق باعدارلاماسى بويىنشا وقيتىن ستۋدەنتتەرگە جۇمىس تاجىريبەسىن ۇسىنۋ پەرسپەكتيۆالارى تالقىلاندى.