28 جانە 29 ناۋرىزدا بەيجىڭدە قىتايداعى قازاقستان ءتۋريزمى جىلىنىڭ رەسمي اشىلۋى وتەدى.
2024 جىلدىڭ قىتايداعى قازاقستان ءتۋريزمى جىلى بولىپ جاريالانعانى قاسىم-جومارت توقايەۆتىڭ 2023 جىلى قىتايعا رەسمي ساپارى بارىسىندا بەلگىلى بولدى. قازىرگى تاڭدا بەيجىڭگە قازاقستاننىڭ رەسمي دەلەگاسياسى باردى، دەپ حابارلايدى اlmaty-akshamy.kz.
ونىڭ قۇرامىندا پرەمەر-مينيستردىڭ ورىنباسارى، سىرتقى ىستەر ءمينيسترى مۇرات نۇرتىلەۋ، تۋريزم جانە سپورت ءمينيسترى ەرمەك مارجىقپايەۆ، سونداي-اق اكىمدىكتەردىڭ، «Kazakh Tourism» ۇلتتىق كومپانياسىنىڭ، «اتامەكەن» ۇكپ-نىڭ وكىلدەرى مەن 150-دەن استام مادەنيەت قايراتكەرلەرى بار. قازىرگى تاڭدا رەسمي ءىس-شارالار وتەتىن نىسانداردا قىزۋ دايىندىق بارىسى ءجۇرىپ جاتىر. كونفەرەنس زال مەن كونسەرتتىك زالدار قوناقتاردى كۇتۋگە ازىرلەنىپ، ارتىستىك ۇجىمدار دايىندىقتارىن جۇرگىزىپ جاتىر. جىلدىڭ اشىلۋى اياسىندا ءبىرقاتار ءىس-شارا وتەدى. ولار تۋريزم جانە ينۆەستيسيالاردى دامىتۋ بويىنشا قازاقستان-قىتاي فورۋمى، قازاقستان وبلىستارىنىڭ كورمەسى، ەتنواۋىلداعى مادەني ءىس-شارالار، سونىمەن قاتار گالا-كونسەرت بولماق. ۇيىمداستىرۋشى – قازاقستان رەسپۋبليكاسى تۋريزم جانە سپورت مينيسترلىگى. ايتا كەتەيىك، فورۋمعا قاتىسۋشىلار قازاقستاننىڭ 17 وبلىسىنىڭ ستەندتەرىن تاماشالاي الادى. وندا ءاربىر ءوڭىردىڭ تۋريستىك نىساندارى كورسەتىلگەن. سونداي-اق فورۋم اياسىندا تۋريزم سالاسىنداعى مەملەكەتتىك ورگاندار مەن كومپانيالاردىڭ قاتىسۋىمەن ەكى پانەلدىك سەسسيا وتەدى. ءبىرىنشى سەسسيا «جۇڭگو ساياحاتشىلارى ءۇشىن قازاقستانداعى ۇيىمداستىرىلعان تۋريزم مۇمكىندىكتەرى»، ەكىنشى سەسسيا «تۋريستىك بيزنەستەگى ارىپتەستىك: قازاقستان-قىتاي اراسىنداعى ينۆەستيسيالىق مۇمكىندىكتەر». وعان قوسا، فورۋم بارىسىندا «Kazakh Tourism» ۇلتتىق كومپانياسى مەن Messe Frankfurt Asia Holding وكىلدەرى اراسىندا ءوزارا تۇسىنىستىك تۋرالى مەموراندۋمعا قول قويىلادى. ءوز كەزەگىندە قازاقستان مادەنيەتىن گالا-كونسەرتتە ونەر كورسەتەتىن ارتىستەر تانىستىرادى. ولاردىڭ قاتارىندا شىعارماشىلىق مۋزىكا جانە بي ۇجىمدارى، سونداي-اق روزا رىمبايەۆا، ءالي وقاپوۆ، مايرا مۇحامەد قىزى، زارينا التىنبايەۆا، «ۇلىتاۋ» توبى جانە باسقا دا جارقىن سوليستەر بار. گالا-كونسەرتتە قىتايدىڭ ونەرپازدارى دا ونەر كورسەتەدى. وعان قوسا، دەلەگاتتار تىزىمىندە وليمپيادا چەمپيونى سەرىك ساپييەۆ، UFC سپورتشىسى شاۆكات راحمونوۆ پەن وليمپيادا جۇلدەگەرى قانات يسلام دا بار.