تۇركىستان وبلىستىق سوتى باسپا ءسوز قىزمەتىنىڭ مالىمەتىنشە، تۇركىستان قالاسىنىڭ اۋدانارالىق سوتىندا قازاقستان رەسپۋبليكاسى قىلمىستىق كودەكسىنىڭ 174-بابى 1-بولىگىمەن 2022 جىلى سوتتى بولعان مۇرات ءابدىلداعا قاتىستى ۇسىنىم قارالدى، دەپ حابارلايدى aqshamnews.kz
ۇسىنىمدا ساۋران اۋداندىق پوليسيا ءبولىمى بلوگەردىڭ مەرزىمىنەن بۇرىن شارتتى تۇردە بوساتۋدىڭ كۇشىن جويىپ، جازانىڭ قالعان وتەلمەگەن بولىگىن باس بوستاندىعىنان ايىرۋ تۇرىندەگى جازاعا اۋىستىرۋدى سۇراعان.
سوتتالعان مۇرات ءابدىلدا 2024 جىلى سوتتىڭ قاۋلىسى نەگىزىندە قىلمىستىق كودەكستىڭ 72-بابىنا ساي باس بوستاندىعىنان ايىرۋ تۇرىندەگى جازاسىنىڭ وتەلمەگەن 2 جىل 11 كۇنىن شارتتى تۇردە مەرزىمىنەن بۇرىن بوساتىلىپ، تۇركىستان وبلىسىنىڭ پوليسيا دەپارتامەتىنىڭ ساۋران اۋداندىق پوليسيا بولىمىنە پروفيلاكتيكالىق ەسەپكە الىنعان.
پروفيلياكتيكالىق ەسەپتە تۇرعانىنا قاراماستان، مۇرات ءابدىلدا 2024 جىلى ورتاق پايدالانۋ ورنىن لاستاعانى ءۇشىن اقبتك 434-2 بابىنىڭ 1-بولىگىمەن اكىمشىلىك جاۋاپتىلىققا تارتىلىپ، وعان ايىپپۇل سالىنعان. سونىمەن قاتار، 2025 جىلدىڭ اقپان-ناۋرىز ايلارىندا 5 رەت تىركەلۋگە كەلمەگەنى جانە 4 رەت تۇنگى ۋاقىتتا تۇرعىلىقتى مەكەنجايىندا بولماعانى انىقتالعان.
مۇرات ءابدىلدانىڭ كىناسى تۋىستارىنىڭ بەرگەن تۇسىنىكتەمەلەرىمەن، ءتيىستى اكتىلەرمەن جانە كۋالەردىڭ جاۋاپتارىمەن تولىق دالەلدەنگەن. ول ءوز كىناسىن ءىشىنارا مويىنداپ، سوتتان وزىنە تاعى ءبىر مۇمكىندىك بەرۋدى سۇراعان.
سوت قاۋلىسىمەن:
تۇركىستان وبلىسىنىڭ پوليسيا دەپارتامەنتىنىڭ ساۋران اۋداندىق پوليسيا باسقارماسىنىڭ ۇسىنىمى قاناعاتتاندىرىلىپ، مۇرات ءابدىلدانىڭ مەرزىمىنەن بۇرىن شارتتى تۇردە بوساتۋدىڭ كۇشى جويىلىپ، جازانىڭ قالعان وتەلمەگەن بولىگى 2 جىل 11 كۇنىن باس بوستاندىعىنان ايىرۋ تۇرىندەگى جازاعا اۋىستىرىلدى.
مۇرات ءابدىلدا سوت زالىندا قاماۋعا الىندى. قاۋلى زاڭدى كۇشىنە ەنگەن جوق.
بۇدان بۇرىن ول 2022 جىلى ق ر قك 174-بابى، ياعني، الەۋمەتتىك، ۇلتتىق، رۋلىق، ناسىلدىك الاۋىزدىقتى ازاماتتاردىڭ ۇلتتىق ار-نامىسى مەن قادiر-قاسيەتiن قورلاۋعا باعىتتالعان قاساقانا ارەكەتتەر جاساعانى ءۇشىن 4 جىل 6 ايعا سوتتالعان ەدى.