«قاراساز كوشەلەرى» دەپ اتالاتىن ادەبي-تانىمدىق دەرەكتى فيلم كورەرمەنگە جول تارتتى
تانىستىرىلىمى جازۋشىلار وداعىندا وتكەن جاڭا فيلم ءوزىنىڭ شىنايىلىعىمەن بىردەن باۋراپ الدى.
ەلۋ مينۋتتىق تۋىندىنىڭ ءون بويىنا قاراساز حالقىنىڭ مۇقاعالي اقىنعا، ونىڭ شىعارمالارىنا دەگەن شەكسىز ماحابباتى وزەك بولىپ ورىلگەن. «ۇيرەك ۇشىپ، قاز قونعان» قاسيەتتى قاراسازدى بەتكە الىپ، جولعا شىققان قوس جىگىتتىڭ ءبىرى، اقىن تۋعان مەكەننىڭ ءتول پەرزەنتى، قازاقستاننىڭ ەڭبەك سىڭىرگەن قايراتكەرى، م.اۋەزوۆ اتىنداعى ۇلتتىق تەاتردىڭ بەلدى ءارتىسى ەركەبۇلان دايىروۆ ساپارلاس سەرىگى، بەلگىلى سىقاقشى ولجاس سىدىقبەكتىڭ "وسى قاراسازدا ەڭبەكتەگەن بالادان ەڭكەيگەن كارىگە دەيىن مۇقاعالي جىرلارىن جاتقا وقيتىنى راس پا؟" دەگەن كۇمانىن سەيىلتۋگە كۇش سالادى. قاراسۋعا شومىلىپ جۇرگەن بالالاردىڭ دا، كوك مايساعا شالعى سالعان شوپشىلەردىڭ دە، جولدا توقتاتقان تراكتوردان قارعىپ تۇسكەن مەحانيزاتوردىڭ دا، دۇكەندەگى ساتۋشىنىڭ دا، كوشەدە كەزدەسكەن ايەلدەردىڭ دە، باقشاسىندا جۇرگەن اۋىل تۇرعىنىنىڭ دا، اق ساقالدى اتانىڭ دا، تۇنگى الاۋ جانىنداعى جاستاردىڭ دا تۇرا قالىپ، مۇزبالاق اقىننىڭ ولەڭدەرىن مۇدىرمەستەن وقي جونەلۋى كورەرمەندى ءتانتى ەتپەي تۇرمايدى. ءفيلمدى تۇسىرۋشىلەردىڭ ايتۋىنشا، كەيىپكەرلەر الدىن الا دايىندالماعان.
«بۇل يدەيا نەگىزى 3-4 جىل بۇرىن كەلگەن. ءبارىمىز دە مۇقاعاليعا قۇشتارمىز، ولەڭدەرىن جاقسى كورەمىز، ءبىراق ونى قاراسازدىڭ حالقىنداي ەشكىم سۇيە المايدى. باجايلاپ قاراساق، اۋزىمىزدىڭ سۋى قۇرىپ ايتاتىن قاراساز تۋرالى ينتەرنەت كەڭىستىگىندە تۇششىمدى دۇنيە جوق ەكەن. الايدا بۇعان دەيىن مۇمكىندىك بولمادى، ءساتى كەلمەدى. بيىل قولعا الىپ، ءوز كۇشىمىزبەن مۇقاعالي ماقاتايەۆتىڭ 90 جىلدىق تورقالى تويىنا تولىمدى تارتۋ جاساۋ ماقساتىندا وسى ءفيلمدى تۇسىردىك. توقتار مۇحامەدي دەگەن كاسىپكەر باۋىرىمىز قارجىلاي دەمەۋ جاسادى. فيلمدە ويناعان اسەت يمانبايەۆ، سافۋان شايمەردەنوۆ سەكىلدى بەلگىلى تەاتر جانە كينو اكتەرلەرى، ءداستۇرلى ءان ونەرىنىڭ بەلدى وكىلى تىلەۋلەس قۇرمانعالييەۆ، رەجيسسور جاندوس ەسپەنبەتوۆ، كومپوزيتور ەرمەك ەلگەزەك، مونتاج رەجيسسەرى نۇركەلدى ەرگوبەك، باسقا دا جىگىتتەر شاما-شارقىنشا ءوز ۇلەستەرىن قوستى. ءفيلمدى ءتۇسىرۋ بارىسىندا قاراسازدى تابيعي قالپىندا، ەشبىر جاساندىلىقسىز بەرۋگە، مۇقاعالي ولەڭدەرىنە جازىلعان اندەردى دە پايدالانۋعا تىرىستىق»، - دەيدى يدەيا اۆتورى، پروديۋسەر، «قوڭىر media group» كومپانياسىنىڭ باسشىسى سەرجان مولداسان ۇلى.
«كينوداعى اۋىل كورىنىستەرى، كوشەلەرى ماعان ەتەنە تانىس. بالالىق شاعىمىز قاراساز، قاراسۋ وزەندەرىنىڭ بويىندا ءوتتى. قاراسازدىڭ تامىلجىعان تابيعاتىنا تامسانىپ وتىرىپ، ءبىر ساعاتتىڭ قالاي وتكەنىن بايقاماي دا قالدىق. ادام مەن تابيعاتتىڭ، قاراپايىمدىلىق پەن شىنايىلىقتىڭ ۇيلەسىمىن تاپقانى سونداي، اۋىلعا بارىپ كەلگەندەي كۇي كەشتىك»، - دەپ اسەرىمەن بولىسكەن اقىننىڭ ۇلى جۇلدىز ماقاتايەۆ پەن كەلىنى باقىتكۇل ءفيلمدى تۇسىرگەن شىعارماشىلىق توپقا العىس ايتتى.
مۇقاعالي مۇراسىن ۇلىقتاپ، ولەڭدەرىنىڭ ومىرشەڭدىگىن پاش ەتكەن جاڭا تۋىندىنىڭ قازاق ونەرىندەگى رۋحاني كەڭىستىكتى تولتىراتىن شىعارمالار قاتارىنان تابىلارى داۋسىز.