جىل باسىنان بەرى ەلىمىزدە 1 ملرد تەڭگەدەن استام ەڭبەكاقى قارىزى تولەنگەن. ۇكىمەتتىڭ كەڭەيتىلگەن كەڭەسىندە پرەمەر-مينيستردىڭ ورىنباسارى التاي كولگىنوۆ وسىنداي مالىمەت بەردى، دەپ حابارلايدى Almaty-akshamy.kz. قازاقپاراتقا سىلتەمە جاساپ.
«ەڭبەك داۋلارى بويىنشا مونيتورينگ تۇراقتى تۇردە جۇرگىزىلەدى جانە ناقتى شارالار قابىلدانۋدا. ونىڭ ناتيجەسىندە 51 كاسىپورىندا پروبلەمالار شيەلەنىسكە جەتكىزبەي شەشىلدى. جىل باسىنان بەرى جۇمىسشىلارعا 1 ملرد تەڭگەدەن استام جالاقى قارىزى وتەلدى، 8 مىڭ ادامنىڭ قۇقىقتارى قورعالدى. ەڭبەك داۋلارى تۇراقتى باقىلاۋدا. شيەلەنىستەردى بولدىرماۋ ءۇشىن اكىمدىكتەرگە جۇيەلى شارالار قابىلداۋ تاپسىرىلدى»، – دەدى ول.
ۇكىمەت باسشىسىنىڭ ورىنباسارى مۇناي-گاز سالاسىنداعى ەڭبەك داۋلارىنا جەكە توقتالدى.
«مۇناي-گاز كاسىپورىندارى شوعىرلانعان باتىس وڭىرلەرگە ۇكىمەت ەرەكشە كوڭىل ءبولىپ وتىر. كەيبىر كاسىپورىنداردا تاۋەكەلدەر ساقتالىپ وتىر. سوندىقتان بۇل ماسەلەنى «سامۇرىق قازىنا»، «قازمۇنايگاز» كومپانيالارى كەشەندى تۇردە قاراستىرۋدا. ولارعا سەرۆيستى قىزمەت كورسەتەتىن كومپانيالار جۇمىسشىلارى ءۇشىن ءبىر جىلدىق ەڭبەك شارتتارىن ءۇش جىلعا سوزۋ ماسەلەلەرىن قاراستىرۋ تاپسىرىلدى»، – دەدى التاي كولگىنوۆ.