مۇناي وڭدەۋ زاۋىتتارىنا ارنالعان جوندەۋ جۇمىستارىنىڭ 5 جىلدىق جوسپارى ازىرلەندى. بۇل تۋرالى ەنەرگەتيكا ءمينيسترى ماعزۇم مىرزاعالييەۆتىڭ قازاقستاننىڭ مۇناي وڭدەۋ زاۋىتتارى باسشىلارىنىڭ قاتىسۋىمەن وتكىزگەن كوشپەلى كەڭەسىندە ءمالىم بولدى، دەپ حابارلايدى almaty-akshamy.kz قازاقپاراتقا سىلتەمە جاساپ..
ق ر ەنەرگەتيكا مينيسترلىگى باسپا ءسوز قىزمەتىنىڭ مالىمەتىنشە، كەزدەسۋ بارىسىندا ۆەدومستۆو باسشىسى بيىل وتاندىق كاسىپورىندار ىشكى نارىقتى ديزەل جانە اۆياوتىنمەن قامتاماسىز ەتۋ بويىنشا مىندەتتى ورىنداي الماعانىن اتاپ ءوتتى. جۇيەلى سيپاتتاعى پروبلەمانىڭ نەگىزگى سەبەپتەرىنىڭ ءبىرى - جوندەۋ جۇمىستارىن ءتيىمسىز جوسپارلاۋ.
«وندىرىستىك قۋاتتى جاڭعىرتۋعا قاراماستان، زاۋىتتار ەڭ قولايسىز ساتتە ۇنەمى جوندەۋگە توقتاپ تۇرادى. ءوسىپ كەلە جاتقان تۇتىنۋ جاعدايىندا جىل سايىنعى 25 كۇندىك توقتاۋ جول بەرىلمەيتىن جاعداي بولىپ وتىر. جوندەۋ جۇمىستارىن جۇرگىزۋدىڭ قولدانىستاعى رەگلامەنتى ەسكىرگەن دەپ ەسەپتەيمىن. كۇردەلى جوندەۋگە جىلىنا ءبىر عانا زاۋىت توقتاۋى ءتيىس. «قازمۇنايگاز» باسشىلىعىنا الداعى 5 جىلعا جاڭا جوسپار ازىرلەۋدى تاپسىرامىن»، - دەدى ماعزۇم مىرزاعالييەۆ.
سونداي-اق مينيسترگە پاۆلودار مۇناي-حيميا زاۋىتىندا جوندەۋ جۇرگىزۋ كەزىندە گيدروتازارتۋ كومپرەسسورى روتورىنىڭ اقاۋلىعى انىقتالعانى تۋرالى باياندالدى. بۇل رەتتە اقاۋلى بولشەكتى تەك 5 ايدان كەيىن عانا اۋىستىرۋعا بولادى جانە وسى كەزەڭ ىشىندە پمحز اي سايىن جوسپارلانعاننان 20-40 مىڭ تونناعا از ديزەل وتىنىن وندىرەتىن بولادى.
وسىعان بايلانىستى ۆەدومستۆو باسشىسى قمگ باسشىلىعىنا موز-بەن بىرلەسىپ كوكتەمگى ەگىن جۇمىستارى باستالعانعا دەيىن، ونىڭ ىشىندە مۇناي ءونىمىنىڭ يمپورتى ەسەبىنەن قور قالىپتاستىرۋدى تاپسىردى. سونىمەن قاتار، ەنەرگەتيكا ءمينيسترى قىسقى ديزەل وتىنىن وندىرۋگە باعىتتالعان «ەرتىس» جوباسىن ۋاقىتىلى ىسكە اسىرۋدى قامتاماسىز ەتۋگە باسا نازار اۋداردى.
«پمحز-نىڭ تۇراقسىز جۇمىسى ىشكى نارىقتى قامتاماسىز ەتۋگە تەرىس اسەر ەتەدى. بۇل، ارينە، بالانسقا اسەر ەتەدى. ءبىز كوكتەمگى ەگىن جۇمىستارىنا جينالعان قالدىقتارسىز قالۋىمىز مۇمكىن»، - دەدى ەنەرگەتيكا مينيسترلىگىنىڭ باسشىسى.
مينيستر ءبىر اپتا ىشىندە كومپرەسسوردىڭ بۇزىلۋ سەبەپتەرىن تەكسەرۋدى اياقتاۋدى تاپسىردى جانە قمگ باسشىلىعىنا زاۋىتتىڭ باس ديرەكتورى وسپانبەك السەيىتوۆكە قاتاڭ سوگىس جاريالاۋدى ۇسىندى.
«قازمۇنايگاز» اق-ىنىڭ دەرەكتەرى بويىنشا 2017 جىلى جۇرگىزىلگەن بارلىق ءۇش ءموز-دى جاڭعىرتۋ ىشكى نارىقتى مۇناي ونىمدەرىمەن تولىق قامتاماسىز ەتۋگە مۇمكىندىك بەرەدى. ماسەلەن، ەلىمىزدە 4،96 ملن توننا اۆتوبەنزين، 5،14 ملن توننا ديزەل وتىنى جانە 623 مىڭ اۆياوتىن وندىرىلەدى.
مينيستر قازىرگى ۋاقىتتا ەل پرەزيدەنتىنىڭ تاپسىرماسى بويىنشا مۇناي ونىمدەرى نارىعىن تۇراقتاندىرۋعا باعىتتالعان شارالار پاكەتى ازىرلەنىپ جاتقانىن اتاپ ءوتتى. بارلىق ۇسىنىستار، ونىڭ ىشىندە باعانى رەتتەۋ ماسەلەسى مۇددەلى مەملەكەتتىك ورگاندارمەن بىرلەسىپ قارالاتىن بولادى.