1%-دان استامعا قىمباتتادى.
دۇيسەنبى كۇنى مۇناي باعاسى 1%-دان استامعا قىمباتتادى، ويتكەنى اقش-تى قامتاماسىز ەتەتىن نەگىزگى قۇبىر ءالى جابىق جانە رەسەي باتىس ەلدەرىنىڭ ەكسپورت باعاسىن تومەندەتەمىز دەگەنىنە جاۋاپ رەتىندە ءوندىرىستى قىسقارتاتىنىن ايتىپ قورقىتتى، دەپ حابارلايدى Almaty-akshamy.kz قازاقپاراتقا سىلتەمە جاساپ.
دۇيسەنبى كۇنى استانا ۋاقىتى بويىنشا ساعات 10:30-عا دەيىن Brent ماركالى مۇناي فيۋچەرستەرى 41 سەنتكە نەمەسە 0،5% - عا ءوسىپ، ءبىر باررەلى 76،51 دوللارعا جەتتى.
West Texas Intermediate ماركالى امەريكالىق مۇناي باررەلىنە 71،55 دوللار دەڭگەيىندە ساۋدالاندى. بۇل بۇرىنعى باعالاردان 53 سەنتكە نەمەسە 0،8%-عا جوعارى.
دۇيسەنبىدە Brent جانە WTI باعاسى ءوستى. ايتا كەتەيىك، وتكەن اپتادا ەكى مۇناي ماركاسى 2021 جىلدىڭ جەلتوقسانىنان باستاپ ەڭ تومەنگى دەڭگەيگە ءتۇسىپ كەتكەن ەدى.
وعان ىقتيمال جاھاندىق رەسەسسيا مۇنايعا سۇرانىسقا اسەر ەتەدى دەگەن ءقاۋىپ سەبەپ بولدى.
«مۇناي باعاسى ءوسىپ جاتىر، ويتكەنى Keystone مۇناي قۇبىرى جابىق، جۇڭگو COVID-تى باقىلاۋدى جەڭىلدەتتى جانە رەسەي ءوندىرىستى قىسقارتۋى مۇمكىن دەگەن ءقاۋىپ بار»، - دەدى OANDA كومپانياسىنىڭ اعا نارىق تالداۋشىسى ەدۆارد مويا.
قۋاتى تاۋلىگىنە 622 مىڭ باررەلدى قۇرايتىن Keystone مۇناي قۇبىرى – ماڭىزدى ارتەريا، ول كانادالىق اۋىر مۇنايدى البەرتا پروۆينسياسىنان اقش-تىڭ ورتا باتىسىنداعى جانە مەكسيكا شىعاناعى جاعالاۋىنداعى مۇناي وڭدەۋ زاۋىتتارىنا جەتكىزەدى.
سونىمەن قاتار، الەمدەگى ەڭ ءىرى شيكى مۇناي يمپورتتاۋشىسى جۇڭگو ءوزىنىڭ كوروناۆيرۋسقا قارسى قاتاڭ ساياساتىن جەڭىلدەتىپ جاتىر.
وسىعان قاراماستان، بەيجىڭدەگى كوشەلەر تىنىش، كوپتەگەن كاسىپورىندار وسى دەمالىس كۇندەرى جۇمىس ىستەمەدى، ال تۇرعىندار قالىپتى جاعدايعا ورالۋعا ءالى كوپ ۋاقىت قاجەت دەيدى.
جۇما كۇنى رەسەي پرەزيدەنتى ۆ. پۋتين الەمدەگى ەڭ ءىرى ەنەرگيا رەسۋرستارىن ەكسپورتتاۋشى ءوزىنىڭ ەلى ءوندىرىستى قىسقارتىپ، G7 ەلدەرى كەلىسكەن رەسەي ەكسپورتىنا «ويعا قونىمسىز» باعا شەگىن بەلگىلەپ، كەز كەلگەن مەملەكەتكە مۇناي ساتۋدان باس تارتۋى مۇمكىن ەكەنىن مالىمدەدى.