قازاقستاندا مۇمكىندىگى شەكتەۋلى جانداردىڭ جۇمىسقا ورنالاسۋى قوعام ءۇشىن ماڭىزدى تاقىرىپتاردىڭ ءبىرى. ومىردەگى ءتۇرلى قيىندىقتارعا قاراماستان، ەڭبەككە دەگەن ىنتا مەن تالپىنىس ەشقانداي شەكتەۋگە مويىنسۇنبايتىنىن دالەلدەگەن جاندار بار. سولاردىڭ ءبىرى – مارينا شاپوشنيكوۆا.
مارينا ءبىرىنشى توپتاعى مۇگەدەك. ول كورۋ قابىلەتىنەن ايىرىلعانىنا قاراماستان، ءبىلىم الۋعا جانە ءوز ورنىن تابۋعا دەگەن ۇمتىلىسىن ەشقاشان جوعالتپاعان. پوليتەحنيكالىق كوللەدجدى جانە باسقارۋ ينستيتۋتىن قىزىل ديپلوممەن اياقتاپ، ماماندىعىن جەتىك مەڭگەرگەن. بۇعان دەيىن بۋحگالتەر بولىپ جۇمىس ىستەگەن. الايدا كورۋ قابىلەتىن جوعالتقان سوڭ، ۇزاق ۋاقىت بويى جۇمىس تابۋ قيىنعا سوقتى.
ءقازىر مارينا ارنايى كىتاپحانادا جۇمىس ىستەيدى. ول بۇل جەردە تەك ەڭبەك ەتىپ قانا قويماي، ءوزى سەكىلدى جاندارمەن بايلانىس ورناتىپ، جاڭا دوستار تاپتى.
"ماعان كىتاپحانادا جۇمىس ىستەگەن ۇنايدى. مۇندا مەن وزىمە جاقىن ورتا تاپتىم. جۇمىسىم قىزىقتى، ادامدارمەن ارالاسامىن. ارينە، كەيدە جالاقى جەتكىلىكسىز بولىپ جاتادى. ءبىراق ەڭ باستىسى – وزىمە ۇنايتىن ىسپەن اينالىسۋ. مەن ءۇشىن ەڭبەك ەتۋ تەك تابىس كوزى ەمەس، ومىرگە دەگەن قۇلشىنىس"، - دەيدى مارينا شاپوشنيكوۆا
مارينا مۇمكىندىگى شەكتەۋلى جانداردىڭ جۇمىسقا ورنالاسۋ ماسەلەسىندە باستى ءرولدى مەملەكەت پەن قوعامنىڭ قولداۋى اتقاراتىنىنا سەنىمدى. ارنايى باعدارلامالار مەن مۇمكىندىكتەر كوبەيسە، مىڭداعان ادام ءوز ورنىن تاباتىنى انىق.
مارينا سياقتى جانداردىڭ وقيعالارى – ءومىردىڭ كەز كەلگەن قيىندىعىن ەڭسەرۋگە بولاتىنىن كورسەتەتىن ۇلگى. ەڭبەك ەتۋگە دەگەن ىنتا مەن تالپىنىس ەشقاشان جوعالماسا، ءاردايىم جاڭا مۇمكىندىكتەرگە جول اشىلادى. جاناشىرلىق پەن قولداۋ كورسەتىلگەن قوعامدا بارلىعىنىڭ ءوز ورنىن تاباتىنى ءسوزسىز.