الماتى قالاسى ءماسليحاتىنىڭ دەپۋتاتتارى الماتى اگلومەراسياسىن دامىتۋدىڭ 2029 جىلعا دەيىنگى كەشەندى جوسپارىن كەلىستى، دەپ حابارلايدى Almaty-akshamy.kz
الماتىدا VIII سايلانىم الماتى قالاسى ءماسليحاتىنىڭ كەزەكتەن تىس IX سەسسياسى ءوتتى. كۇن تارتىبىندەگى ماسەلەلەردىڭ ءبىرى – الماتى اگلومەراسياسىن دامىتۋدىڭ 2029 جىلعا دەيىنگى كەشەندى جوسپارىن كەلىسۋ.
كەشەندى جوسپار اگلومەراسيانىڭ ورنىقتى الەۋمەتتىك-ەكونوميكالىق دامۋىن قامتاماسىز ەتۋگە باعىتتالعان. قۇجات اۋماقتىق، الەۋمەتتىك، جول-كولىك، ينجەنەرلىك، ەكونوميكالىق، ەكولوگيالىق جانە سيفرلىق دامۋ بويىنشا 16 ستراتەگيالىق باعىت اياسىنداعى جوبالاردى قامتيدى.
ءوز سوزىندە الماتى اكىمىنىڭ ورىنباسارى اسقار ءامرين اتاپ وتكەندەي، كەشەندى جوسپار اياسىندا قالا جانە وبلىس اكىمدىكتەرىنىڭ دامۋدىڭ نەگىزگى باعىتتارى بويىنشا قىزمەتىن ۇيلەستىرۋدى كوزدەيدى.
«سيفرلىق دامۋ باعىتىندا دەرەكتەر بازاسىن ينتەگراسيالاۋ جانە ءبىرىڭعاي گەواقپاراتتىق جۇيەنى جۇرگىزۋ جوسپارلانۋدا. بۇل اگلومەراسيانىڭ كارتوگرافيالىق جانە قالا قۇرىلىسى دەرەكتەرىن بىرىكتىرۋگە، قالا ماڭى اۋماقتارىنىڭ نىسانالى ماقساتىن بەكىتۋگە جانە ت.ب. مۇمكىندىك بەرەدى، - دەدى العى سوزىندە اسقار ءامرين.
- الماتى قالاسىنىڭ كولىك قاڭقاسىن ءتيىمدى ىسكە اسىرۋ ءۇشىن قاجەتتى الماتى اگلومەراسياسىنىڭ ءبىرىڭعاي كولىك مودەلى ازىرلەنەتىن بولادى».
اسقار ءامرين «قالا مەن قالا ماڭى ايماعىندا قوعامدىق كولىكتى ينتەگراسيالاۋ، باكاد-قا دەيىنگى 4 راديالدى جانە 7 ىشكى ماگيسترالدىق كوشەلەردى تەسۋ، قالا ماڭىنداعى تەمىرجول جولاۋشىلار تاسىمالىن دامىتۋ كوزدەلگەنىن» ايتتى.
ونىڭ ايتۋىنشا، جاڭا ءبىلىم بەرۋ جانە دەنساۋلىق ساقتاۋ نىساندارىن سالۋ، سونداي-اق قالا ماڭى ايماعىندا جۇمىس ورىندارىن قۇرۋ ەسەبىنەن الەۋمەتتىك سالانى دامىتۋعا ءبىرىڭعاي ءتاسىل ىسكە اسىرىلاتىن بولادى. سونىمەن قاتار، ءبىرىڭعاي جاسىل اگلومەراسيا ءدالىزى جانە تاعى باسقالار قۇرىلادى.
ەستەرىڭىزگە سالساق، الماتى اگلومەراسياسىن دامىتۋدىڭ 2029 جىلعا دەيىنگى كەشەندى جوسپارىنىڭ جوباسىن الماتى قالاسى مەن الماتى وبلىسىنىڭ حاتشىلىقتارى «اگلومەراسيالاردى دامىتۋ تۋرالى» زاڭنىڭ 13-بابىن ىسكە اسىرۋ شەڭبەرىندە ازىرلەگەن بولاتىن. بۇعان دەيىن كەشەندى جوسپاردى الماتى اگلومەراسياسىنىڭ جەرگىلىكتى كەڭەسى كەلىسكەن.