اقتوبە قالاسىندا اسىق اتۋدان ەرەسەكتەر اراسىندا قازاقستان كۋبوگى باستالدى.
ول 1 قاراشاعا دەيىن جالعاسادى، دەپ حابارلايدى Almaty-akshamy.kz.
استانا، شىمكەنت، اقتوبە قالالارى مەن قوستاناي، پاۆلودار، ۇلىتاۋ، جامبىل، ماڭعىستاۋ، سولتۇستىك قازاقستان، باتىس قازاقستان وبلىستارىنان جينالعان 100-دەن اسا سپورتشى سايىسقا تۇسەدى. ەرلەر – اسىق اتۋدان جارىسسا، ايەلدەر بەس اسىقتان ب ا ق سىنايدى.
ءدۇبىرلى دودانىڭ اشىلۋ سالتاناتى ق ر اسىق اتۋ فەدەراسياسىنىڭ پرەزيدەنتى اسلان سۇلتانوۆ پەن ق ر اسىق اتۋ فەدەراسياسىنىڭ اتقارۋشى ديرەكتورى جومارت سابىرجانوۆتىڭ قاتىسۋمەن ءوتتى.
«فەدەراسيا ۇلتتىق سپورتتى دامىتۋعا كۇش سالىپ كەلەدى. جەكە ءوز باسىم جاڭادان سايلانعان باسشى رەتىندە وسى ءىستى زەرتتەپ-زەردەلەپ، جان-جاقتى جۇمىس جۇرگىزۋگە كىرىسىپ كەتتىم. الداعى ۋاقىتتا، ياعني بيىلعى جىلدىڭ سوڭىنا دەيىن جانە كەلەسى جىلى ىسكە اسىراتىن ناقتى جوبالارىمىز بار. ال بۇگىنگى جارىسقا قاتىساتىن بارلىق سپورتشىعا ساتتىلىك تىلەيمىن» - دەپ مالىمدەدى اسىق اتۋ فەدەراسياسىنىڭ پرەزيدەنتى اسلان سۇلتانوۆ ءتۋرنيردىڭ رەسمي اشىلۋىندا سويلەگەن سوزىندە.
قازاقستان كۋبوگىنداعى جەڭىمپاز كوماندالار ءۇشىن قارجىلاي سىياقى قاراستىرىلعان.
سونىمەن قاتار، جەڭىمپازدار مەن جۇلدەگەرلەر ق ر تۋريزم جانە سپورت مينيسترلىگى سپورت جانە دەنە شىنىقتىرۋ ىستەرى كوميتەتىنىڭ كۋبوگىمەن، ديپلومدارىمەن جانە مەدالدارىمەن ماراپاتتالادى.
قوسىمشا اقپارات:
«اسىق اتۋ» رەسپۋبليكالىق فەدەراسياسىنىڭ پرەزيدەنتى - وتاندىق كاسىپكەر اسلان سۇلتانوۆ. فەدەراسيا جەتەكشىسى بولىپ 2023 جىلدىڭ تامىز ايىندا سايلاندى.
ق ر «اسىق اتۋ» فەدەراسياسى ق ر ۇلتتىق سپورت قاۋىمداستىعىنا مۇشە. ۇلتتىق سپورت قاۋىمداستىعىنىڭ قۇرامىنا 9، ياعني «بايگە»، «كوكپار»، «اۋدارىسپاق»، «جامبى اتۋ»، «ءداستۇرلى ساداق اتۋ»، «توعىزقۇمالاق»، «اسىق اتۋ»، «تەڭگە ءىلۋ» جانە «قۇسبەگىلىك» فەدەراسيالارى كىرەدى.
ق ر ۇلتتىق سپورت قاۋىمداستىعىنىڭ پرەزيدەنتى – تانىمال كاسىپكەر، مەسەنات يسلامبەك سالجانوۆ.