الماتىدا بەرەشەگى بار 3 كومپانيانىڭ لاۋازىمدى تۇلعالارى جاۋاپقا تارتىلدى
بۇل تۋرالى الماتى قالاسى بويىنشا مەملەكەتتىك كىرىستەر دەپارتامەنتىنىڭ باسشىسى قانات باەدىلوۆ ايتتى، دەپ حابارلايدى اlmaty-akshamy.kz.
«ءبىزدىڭ جۇمىسىمىزدىڭ ماڭىزدى باعىتتارىنىڭ ءبىرى - سالىق بەرەشەگىن ءوندىرىپ الۋ، ياعني سالىقتى ۋاقتىلى تولەمەگەن سالىق تولەۋشىلەرگە شارالار قولدانۋ. بۇل جۇمىس بۇگىنگى تاڭدا اۆتوماتتاندىرىلعان، ياعني بەرەشەك پايدا بولعان كەزدە اقپاراتتىق جۇيە ارقىلى سالىق تولەۋشىگە حابارلاما جولدانادى، بانكتىك شوتتار بۇعاتتالادى»، - دەدى ول.
سپيكەردىڭ سوزىنشە، بۇگىنگى كۇنى مەگاپوليستە سالىقتار بويىنشا بەرەشەك سوماسى - 146 ملرد تەڭگە.
«سونىڭ ىشىندە، بەرەشەكتىڭ قوماقتى مولشەرى نەمەسە 94 ملرد تەڭگەدەن استام سوماسى - قىلمىستىق ىستەر بارىسىندا 3 بۋكمەكەرلىك كومپانياعا قاتىستى تاعايىندالعان تەكسەرۋ ناتيجەلەرى بويىنشا پايدا بولعان قارىز. بۇل كومپانيالاردىڭ لاۋازىمدى تۇلعالارى سوت ۇكىمى بويىنشا ءارتۇرلى مەرزىمگە باس بوستاندىقتارىنان ايىرىلدى»، - دەدى قانات باەدىلوۆ.
ونىڭ ايتۋىنشا، ازىرگە بۇل سومادان 16،9 ملرد تەڭگە ءوندىرىپ الىندى.
«اتاپ ايتار بولسام، «Alpha-bet» جشس-نەن 6 813 ملن تەڭگە، "OLIMP KZ" جشس-نەن 868 ملن تەڭگە جانە «Onlybet» كومپانياسىنان 9 219 ملن تەڭگە ءوندىرىلدى. سوت ورىنداۋشىلارىمەن بىرگە جۇمىستار جالعاسۋدا»، - دەدى ول.
سونىمەن قاتار، ول بانكروتتىق راسىمدەر جەڭىلدەتىلگەنىن جەتكىزدى.
«كاسىپورىننىڭ تولەم قابىلەتسىزدىگىن انىقتاۋدىڭ جالعىز كريتەرييى - بورىشتىڭ اكتيۆتەردەن اسىپ كەتۋى. وتكەن جىلى 173 بورىشكەر، ال اعىمداعى جىلدىڭ ءبىرىنشى توقسانىندا 37 بورىشكەر بانكروت بولىپ تانىلدى. ولار بويىنشا بەرەشەكتىڭ ەسەپتەن شىعارىلعان سوماسى 88،6 ملرد تەڭگەنى قۇرادى»، - دەيدى سپيكەر.