زاڭعار جازۋشىنىڭ مەرەيتويىن اتاپ وتۋگە ەلدە دايىندىق ءجۇرىپ جاتىر.
بۇگىن ق ر پرەمەر-مينيسترىنىڭ ورىنباسارى ە. توعجانوۆتىڭ توراعالىعىمەن م.اۋەزوۆتىڭ 125 جىلدىق مەرەيتويىن اتاپ وتۋگە دايىندىق جونىندەگى جۇمىس توبىنىڭ وتىرىسى ءوتتى. وعان ءبىرقاتار مەملەكەتتىك ورگان وكىلدەرى مەن ءوڭىر اكىمدەرى، قازاقستان جازۋشىلار وداعى مەن م. اۋەزوۆ اتىنداعى ادەبيەت جانە ونەر ينستيتۋتىنىڭ باسشىلىعى، تانىمال تاريحشىلار مەن ادەبيەتتانۋشىلار قاتىستى. قازاقتىڭ زاڭعار جازۋشىسىنىڭ مەرەيتويىن اتاپ ءوتۋ جونىندەگى جالپى رەسپۋبليكالىق جوسپارعا سايكەس، بيىل 4 باعىت بويىنشا 82 ءىس-شارا ۇيىمداستىرىلادى، دەپ حابارلايدى Almaty-akshamy.kz Primeminister.kz سايتىنا سىلتەمە جاساپ.
ونىڭ ىشىندە م.اۋەزوۆتىڭ ادەبي-مەموريالدىق مۋزەيى عيماراتىنا عىلىمي-رەستاۆراسيالاۋ جۇمىستارى جۇرگىزىلىپ، شولپان-اتادا جازۋشىنىڭ ءبيۋستى ورناتىلادى. مەكتەپ وقۋشىلارىنا ارنالعان «اۋەزوۆتانۋ» بەينەدارىستەر سيكلى ازىرلەنىپ، ادەبي پودكاستتار جاسالادى. حالىقارالىق تەاتر فەستيۆالى وتكىزىلىپ، «اقان-زايرا» تراگەدياسى العاش رەت ساحنالاناتىن بولادى. سونداي-اق «قيلى زامان» پوۆەسى بويىنشا تەلەحيكايا ءتۇسىرۋ قولعا الىنادى.
شەتەل مۇراعاتتارىندا م. اۋەزوۆكە قاتىستى قۇجاتتار زەردەلەنىپ، تىڭ ماتەريالداردى ىزدەستىرۋ قاراستىرىلعان. ودان بولەك، وڭىرلىك دەڭگەيدە جوسپاردان تىس 500-دەن اسا مەرەكەلىك شارا وتكىزۋ كوزدەلىپ وتىر. وسىعان بايلانىستى ە. توعجانوۆ جازۋشىنىڭ مەرەيتويىن اتاپ وتۋگە بارلىق ءوڭىر لايىقتى دەڭگەيدە اتسالىسۋى قاجەتتىگىن اتاپ ءوتتى. كەڭەس بارىسىندا ادەبيەتتانۋشىلار مەن جازۋشىلار تاراپىنان مەرەيتويدى اتاپ وتۋگە قاتىستى ءبىرقاتار ۇسىنىس ايتىلىپ، جۇمىس توبى ولاردى ءىس-شارالار جوسپارىنا ەنگىزۋدى ماقۇلدادى.
ۆيسە-پرەمەر قوعامدىق ماڭىزى بار مادەني-بۇقارالىق، اقپاراتتىق-يميدجدىك، عىلىمي زەرتتەۋ، اعارتۋشىلىق ءىس-شارالاردىڭ جوعارى دەڭگەيدە ورىندالۋى ءۇشىن ءبىرقاتار تاپسىرما بەردى. اتاپ ايتقاندا، مادەنيەت جانە سپورت مينيسترىلىگىنە جوسپار مەن مەرەيتوي لوگوتيپىن بارلىق مەملەكەتتىك ورگانعا ۋاقىتىلى جولداۋدى جانە ونىڭ ىسكە اسىرىلۋى تۋرالى ەسەپتىك اقپاراتتى توقسان سايىن ۇكىمەتكە ەنگىزىپ وتىرۋدى تاپسىردى. سونىمەن قاتار مۇددەلى مەملەكەتتىك ورگاندار مەن ۇيىمدارعا جوسپاردىڭ ساپالى ورىندالۋىن قامتاماسىز ەتۋ قاجەتتىگىن ەسكەرتتى.