ەڭبەك جانە حالىقتى الەۋمەتتىك قورعاۋ مينيسترلىگىنىڭ مالىمەتىنشە، 2025 جىلى رەسپۋبليكالىق بيۋدجەتتەن مۇگەدەكتىك جانە اسىراۋشىسىنان ايرىلۋ بويىنشا جاردەماقى تولەۋگە 488،5 ملرد تەڭگە ءبولىندى، دەپ حابارلايدى aqshamnews.kz
بۇعان قوسا، مەملەكەتتىك الەۋمەتتىك ساقتاندىرۋ قورى (ءماسق) تاراپىنان ەڭبەككە قابىلەتتىلىكتەن ايىرىلۋ جانە اسىراۋشىسىنان ايرىلۋ جاعدايلارىنا بايلانىستى 66،8 ملرد تەڭگە كولەمىندە الەۋمەتتىك تولەمدەر جاسالدى.
2025 جىلعى 1 قازان جاعدايىنا سايكەس، مۇگەدەكتىك بويىنشا مەملەكەتتىك الەۋمەتتىك جاردەماقى الۋشىلاردىڭ سانى 544 مىڭ ادامدى، ال اسىراۋشىسىنان ايرىلۋ بويىنشا جاردەماقى الۋشىلاردىڭ سانى - 155،9 مىڭ ادام.
مۇگەدەكتىك بويىنشا مەملەكەتتىك الەۋمەتتىك جاردەماقىنىڭ مولشەرى مۇگەدەكتىك توبى مەن سەبەبىنە، سونداي-اق ءتيىستى قارجى جىلىنا ارنالعان «رەسپۋبليكالىق بيۋدجەت تۋرالى» زاڭدا بەلگىلەنەتىن ەڭ تومەنگى كۇنكورىس دەڭگەيىنە بايلانىستى ەسەپتەلەدى.
اسىراۋشىسىنان ايرىلۋ جاعدايىنداعى جاردەماقى مولشەرى قايتىس بولعان (قازا تاپقان) ادامنىڭ اسىراۋىنداعى ادامدار سانىنا، ءولىم سەبەبىنە جانە كۇنكورىس مينيمۋمىنىڭ مولشەرىنە تاۋەلدى.
الەۋمەتتىك تولەمدەردىڭ كولەمى ءار ادام ءۇشىن جەكە ەسەپتەلەدى جانە ول كەلەسى كورسەتكىشتەرگە بايلانىستى:
• سوڭعى ەكى جىلداعى ءماسق-قا اۋدارىلعان الەۋمەتتىك جارنالار ەسەپتەلگەن ورتاشا ايلىق تابىسقا،
• ەڭبەككە قابىلەتتىلىكتەن ايىرىلۋ كوەففيسيەنتىنە،
• اسىراۋىنداعى ادامدار سانىنا،
• مىندەتتى الەۋمەتتىك ساقتاندىرۋ جۇيەسىنە قاتىسۋ وتىلىنە،
• تابىس ورنىن الماستىرۋ كوەففيسيەنتىنە.
2025 جىلعى 1 قاڭتاردان باستاپ، كۇنكورىس مينيمۋمىنىڭ وسۋىنە بايلانىستى مۇگەدەكتىك پەن اسىراۋشىسىنان ايرىلۋ بويىنشا مەملەكەتتىك الەۋمەتتىك جاردەماقىلار 6،5 %-عا ۇلعايتىلدى.
ۇكىمەت شەشىمىمەن ەڭبەككە قابىلەتتىلىكتەن ايىرىلۋ جانە اسىراۋشىسىنان ايرىلۋ جاعدايلارىنا بايلانىستى ءماسق تولەمدەرى دە 6،5 %-عا ارتتى.
سونىمەن، جالپى اۋرۋدان مۇگەدەك بولعاندارعا ارنالعان مەملەكەتتىك الەۋمەتتىك جاردەماقىنىڭ مولشەرى:
• I توپ – 101 702 تەڭگە،
• II توپ – 81 362 تەڭگە،
• III توپ – 55 474 تەڭگە.
2025 جىلعى 1 قازان جاعدايىنا سايكەس، ەڭبەككە قابىلەتتىلىكتەن ايىرىلۋ بويىنشا ورتاشا الەۋمەتتىك تولەم مولشەرى 72 087 تەڭگەنى، ال اسىراۋشىسىنان ايرىلۋ بويىنشا – 75 064 تەڭگە.