مۇگەدەكتىگى بار ادامداردىڭ قۇقىعى قالاي بۇزىلىپ جاتىر؟

ماماندار وسى جىلدىڭ التى ايىندا 1،9 مىڭنان استام زاڭ بۇزۋشىلىق بولعانىن انىقتاعان.

ارنايى جۇرگىزىلگەن تەكسەرۋلەر بارىسىندا ەڭبەك جانە حالىقتى الەۋمەتتىك قورعاۋ مينيسترلىگىنىڭ ماماندارى زاڭ بۇزۋشىلىقتاردىڭ بارىن انىقتاعان، دەپ حابارلايدى Almaty-akshamy.kz.

«ءبىرىنشى جارتىجىلدىقتا مەملەكەتتىك باسقارۋ، دەنساۋلىق ساقتاۋ، مادەنيەت جانە كولىكتىك قىزمەت كورسەتۋ سالالارىنداعى نىسانداردا زاڭ بۇزۋشىلىقتاردى انىقتاۋ بويىنشا، ونىڭ ىشىندە مۇگەدەكتىگى بار ادامدار ءۇشىن قولجەتىمدى ورتانى قامتاماسىز ەتۋ تۇرعىسىنان 469 باقىلاۋ ءىس-شاراسى وتكىزىلدى. وسى ورايدا 312 تەكسەرىس جوسپارلى الدىن الۋ-باقىلاۋ اياسىندا جانە 157ء-سى ازاماتتاردىڭ وتىنىشتەرى نەگىزىندە جوسپاردان تىس جۇرگىزىلدى»، – دەلىنگەن ەڭبەك جانە حالىقتى الەۋمەتتىك قورعاۋ مينيسترلىگىنىڭ باسپا ءسوز قىزمەتىنىڭ حابارلاماسىندا. 

مامانداردىڭ ايتۋىنشا، تەكسەرۋ قورىتىندىسى بويىنشا ق ر «مۇگەدەكتەردى الەۋمەتتىك قورعاۋ تۋرالى» زاڭىنىڭ 1603 بۇزىلۋى جانە «ارناۋلى الەۋمەتتىك قىزمەتتەر تۋرالى» زاڭىنىڭ 315 بۇزىلۋى انىقتالدى.

بۇل رەتتە 1،5 مىڭنان استام زاڭ بۇزۋشىلىق مۇگەدەكتەردىڭ الەۋمەتتىك جانە كولىك ينفراقۇرىلىمى نىساندارىنا، مادەني-ويىن-ساۋىق ۇيىمدارى مەن سپورت عيماراتتارىنا كىرىپ-شىعۋىن قامتاماسىز ەتپەۋمەن بايلانىستى بولىپ وتىر.

«تەكسەرۋلەر ناتيجەسىندە مۇگەدەكتىگى بار ادامداردى الەۋمەتتىك قورعاۋ جانە ولارعا ارناۋلى الەۋمەتتىك قىزمەت كورسەتۋ سالاسىندا انىقتالعان زاڭ بۇزۋشىلىقتاردى جويۋعا 379 نۇسقاما بەرىلدى، ولاردىڭ 71ء-ى بويىنشا جالپى سوماسى 7،4 ملن تەڭگەگە اكىمشىلىك ايىپپۇل سالىندى»، – دەپ حابارلايدى ماماندار.